Қатор мустақил нашрлар парламент спикери Нурланбек Шакиевга ОАВ ва интернетда «туҳмат ва ҳақоратлар» учун жарималар тўғрисидаги қонун лойиҳаси бўйича хат билан мурожаат қилди.
Улар спикерни журналистлар, фуқаролик жамияти ва давлат органлари вакиллари иштирокида парламент муҳокамаларини ташкил қилишга чақирди.
Нашрлар Жогорку Кенеш регламенти парламент муҳокамаларини кафолатлашини таъкидлашди. Гап қонуннинг 115-моддаси ҳақида кетмоқда, у «фуқароларнинг конституциявий ҳуқуқлари, эркинликлари ва мажбуриятлари ҳамда ОАВга тааллуқли қонун лойиҳалари бўйича мажбурий равишда муҳокама ўтказилишини талаб қилади».
Нашрлар шунингдек, парламент муҳокамалари ҳужжатни парламентда иккинчи ўқишда кўриб чиқишдан олдин уни ҳар томонлама муҳокама қилишни таъминлашини қўшимча қилдилар.
Жогорку Кенеш ушбу қонун лойиҳасини 23 октябрь куни биринчи ўқишда маъқуллаган эди.
Ҳужжат Маданият вазирлиги томонидан ишлаб чиқилган. Унга кўра, ОАВ ёки интернетдаги ҳақорат учун жисмоний шахсларга 100 минг сом, юридик шахсларга эса 200 минг сом жарима жорий этиш таклиф қилинмоқда. Шунингдек, ОАВ ва интернетда туҳмат қилиш учун ҳам худди шундай жарималар қўллаш кўзда тутилган. Бироқ, депутатлар жарималарни жисмоний шахслар учун 20 минг сомга, юридик шахслар учун эса 60 минг сомгача камайтиришни таклиф қилишди.
Лойиҳа ташаббускорларининг айтишича, сўнгги пайтларда ОАВ ва интернет орқали ҳақорат ва камситиш ҳолатлари сони кўпайган.
