Бу ҳақда Қирғизистон Вазирлар маҳкамасининг етакчиси Ақилбек Жапаров 7 ноябрь куни Ахборот ва матбуот куни муносабати билан ОАВ вакиллари учун ўтказилган байрам дастурхонида айтди. У журналистларни касбий байрам билан табриклади.
«Технологиялар даврида сизнинг ролингиз фақат ортиб бораверишига ишонаман. Сунъий интеллект инсон тушунчаси, интуицияси ва ҳамдардлик қобилиятини алмаштирмайди — айнан шу хусусиятлар журналистикани ҳақиқатан уникал қилади», — деди бош вазир.
Жапаров журналистларни Қирғизистонни туристлар учун жозибали мамлакат сифатида «ижобий имиджини шакллантиришга» чақирди.
«Келинглар, юртимиз ҳақида ижобий кайфиятда ёзиб, салбий янгиликларга камроқ эътибор қаратайлик», — деди бош вазир.
Ақилбек Жапаров бундай баёнотлар билан бир неча бор чиқиш қилган. 2018 йилда, парламент депутати бўлганида, ҳатто туризмни ривожлантириш мақсадида рус тилида ва интернетда салбий янгиликларни чоп этишни тақиқлашни таклиф қилган эди. 2022 йилда эса Жапаров «ёмон янгиликлар» туризмга салбий таъсир кўрсатишини айтиб, икки милиция ходими томонидан ёш қизнинг зўрлангани мисолида бу фикрни келтирган эди.
