Президент Садир Жапаров «Кабар»га берган интервьюсида Temirov Live’нинг собиқ ва ҳозирги ходимлари иши ҳақида яна бир бор фикр билдирди. Ушбу иш бўйича 11 журналистга оммавий тартибсизликларга чақирганлик айблови қўйилиб, давлат айбловчилари уларга олти йиллик қамоқ жазосини сўрамоқда.
Давлат раҳбари ёлғон маълумот эркин сўзнинг бир қисми эмаслигини таъкидлади.
«Қирғизистонда сўз эркинлиги бор, бўлган ва бўлади. […] 11 журналистга келсак, уларнинг фақат икки нафари ростдан ҳам журналист. Қолганлар, айтилганидек, фақат 11-синф даражасида таълим олган. Уларнинг кимларгадир пул олганини ва уларнинг ижтимоий тармоқларда тартибсизликка чақирувчи ёлғон хабарларни тарқатганини қандай инкор қилиш мумкин? Яна бир бор таъкидлайман, тартибсизликка чақирувчи ёлғон маълумот сўз эркинлигининг бир қисми эмас», — деди у.
Президент, шунингдек, ушбу 11 киши профессионал дипломга эга эмаслигини аввал ҳам таъкидлаган ва уларни «ноҳақ журналистлар» деб атаган эди. Бунинг жавобида Temirov Live асосчиси Болот Темиров ушбу шахслар журналистика факультетларини битирганлик дипломига эга эканини айтган эди.
Сўзининг якунида президент ҳукумат ОАВ билан ҳамкорликка очиқлигини билдирди.
«Ижтимоий тармоқларда ёлғон маълумот тарқатманг, далилсиз бўҳтон қилманг, кимнингдир шаънига тегманг. Мамлакатнинг исталган жойида ўз талабларингизни ёки танқидларингизни, шу жумладан ҳукуматга нисбатан ҳам, далиллар билан билдиришингиз мумкин. Биз ўз камчиликларимизни тўғрилаймиз ва сизларнинг муаммоларингизни ҳал қилишга ҳаракат қиламиз», — деди Жапаров.
Милиция 16 январда Temirov Live’нинг 11 нафар собиқ ва ишлаётган ходимини оммавий тартибсизликка чақирганлик айблови билан ҳибсга олган. Барча айбланувчилар қўйилган айбловлар билан рози эмаслигини билдирган.
Аввалроқ бир қатор халқаро инсон ҳуқуқларини ҳимоя қилувчи ташкилотлар Қирғизистон ҳукуматини журналистларга нисбатан жиноий таъқибни тўхтатиш ва уларга қўйилган айбловларни бекор қилишга чақирган эди.
