Мамлакат раҳбари Садир Жапаров Ўш шаҳар кенгаши депутатлари мэр Бақитбек Жетигеновга ишончсизлик кўрсатган қароридан рози эмаслигини айтди. Бу ҳақда мамлакат раҳбари 12 декабрь куни «Кабар» миллий агентлигига берган интервьюсида маълум қилди.
Президент «бу ҳодиса ортида қайси депутатларнинг шахсий манфаатлари ва шахсий норозиликлари турганини яхши билишини» айтди. Жапаров, шунингдек, «агар улар шикоятлар ортидан раҳбарларни ишдан бўшатишда давом этсалар, ҳеч ким давлат хизматида ишламайди», деб қўшимча қилди.
«Депутатлар “қонун ишлаши керак, бизнинг қарор бажарилиши керак” деган талаб қўяётган экан Қонунларнинг аниқ амалга оширилишини, адолатни, холисликни талаб қилишдан аввал ўзлари адолатли бўлишсин, ўзлари қонунларни ҳурмат қилишсин, ўзлари коррупция билан шуғулланишни тўхтатишсин.
Шундан сўнг, қонун ҳақида гапиришса ярашади. Янги мэрни тайинлаш чоғида “Ўшни тартибга келтир”, деб топшириқ бергандим. Шаҳар мэри уларнинг ҳаммасини тартибга солиб, бузадиганини бузяпти. Албатта, ноқонуний қурилиш қурган депутатларга бундай нарсалар ёқмайди», деди давлат раҳбари.
Жапаров мэрга қарши чиққан халқ вакиллари орасида «коррупция билан кун кўрган депутатлар ҳам борлигини, керак бўлса, вақти келиб ҳаммасининг номини тилга олишини» таъкидлади.
Аввалроқ, 14 ноябрь куни Ўш шаҳар кенгашининг навбатдан ташқари сессиясида депутатлар шаҳар мэри Бақитбек Жетигеновга ишончсизлик билдирган эди.
Ишончсизлик билдириш масаласи шаҳар Кенгашидаги фракция етакчилари томонидан кўтарилиб, депутатлар ташаббусни қўллаб-қувватлади. Ёпиқ овоз беришда 45 депутатдан 42 нафари иштирок этди, улардан 38 нафари ишончсизлик вотумини қўллаб-қувватлаган бўлса учтаси қарорга қарши овоз берган.
Бақитбек Жетигенов 2022 йилнинг ноябрида Ўш мэри этиб тайинланган эди.
