«Клооп»ни ёпиш бўйича суд: Иш вақтинча тўхтатилиб, қайтадан экспертиза тайинланди

176
Октябрь туман судидаги мажлис. Сурат: «Клооп»

12-декабрда Бишкекнинг Октябрь туман судида «Клооп»нинг фаолиятини тугатиш бўйича шаҳар прокуратурасининг даъво аризаси кўриб чиқилди.

Суд мажлисида прокуратура «Клооп»нинг сайтида чоп этилган мақолаларни лингвистик ва психологик-психиатрик экспертизадан ўтказишни сўради.

«Клооп»нинг адвокатлари прокуратура таклифига эътироз билдириб, иш материалларида мазкур экспертиза хулосалари борлигини таъкидлади.

Прокуратура вакиллари аввалги экспертиза хулосаси фуқаролик иши эмас, балки жиноят иши бўйича чиқарилганини айтишди.

Натижада суд прокуратура талабини қаноатлантирди ва веб-сайтда эълон қилинган 10 та мақолани қайта ўрганиб чиқди. Экспертиза Бишкекдаги Республика психиатрия ва наркология маркази томонидан ўтказилади. Мазкур иш бўйича иш юритиш номаълум муддатга тўхтатилди.

«Клооп»га қарши даъво аризаси

Бишкек шаҳар прокуратураси пойтахтнинг Октябрь ва Биринчи Май туман судларига «Клооп Медиа» жамоат фондини тугатиш тўғрисида даъво аризаси киритди. Ҳужжатда даъвонинг сабаби қатори «кўрсатилган устав доирасидан ташқари фаолият олиб бораётгани» айтилади.

Аризага кўра, «Клооп Медиа» ОАВларнинг давлат реестрида рўйхатга олинмаган, ташкилотнинг уставида эса ахборот тарқатиш фаолияти кўрсатилмаган деб айтилган. Аслида, «ёшлар ва фуқаролик жамиятининг бошқа вакилларининг ижтимоий-сиёсий, иқтисодий жараёнлар бўйича ўз фикрини эркин баён этиши учун ахборот платформасини тузиб бериш» кўрсатилган.

Шу билан бирга, ҳужжатнинг катта қисми бутунлай бошқа мавзуга бағишланган – «Клооп»нинг мақолалари Қирғизистонга салбий таъсир кўрсатаётган эмиш.

Бир қатор таниқли халқаро инсон ҳуқуқлари ташкилотлари ва медиажамоатчилик  «Клооп»ни ҳимоя қилувчи баёнотлар билан чиқишган. Уларнинг бари қирғиз ҳукуматини нашрга қарши аризани қайтариб олишга, журналистларга нисбатан тазйиқларни ҳамда сўз эркинлигига нисбатан босимни тўхтатишга чақиришган.