Хусусий клиниканинг бошчиси Алмазбек Исманкулов 19 апрелда уй қамоғига чиққани маълум бўлди. Бу ҳақда «Клооп»га шаҳар судининг матбуот хизматидан билдиришди.
Бишкек шаҳар суди Исманкуловнинг ТИЗО-1даги эҳтиёт чорасини 9 июнгача уй қамоғи чорасига ўзгартирди.
Исманкулов 2023 йилнинг февралида коррупция иши бўйича қамоққа олинган. Тергов версияси бўйича, Исманкуловнинг хусусий клиникаси жойлашган №6 касалхонанинг корпуси ижарага берилмаслиги керак эди.
Натижада амалдорларнинг ноқонуний ҳаракати сабаб давлатга 93 млн 162 минг 576 сом зарар келтирилган. Дастлаб Исманкулов бу иш бўйича гувоҳ сифатида сўроққа чақирилган, аммо сўроқ вақтида унинг мақоми ўзгартирилиб, ўша жойда қамоққа олинган.
Бу иш бўйича қўлга олинган Муниципал мулкни бошқариш департаментининг директори Талант Рискулбек ўғли ҳам уй қамоғига чиқарилган.
2023 йилнинг мартида Бишкек мэриясининг ходимлари Исманкуловнинг клиникасини шаҳар касалхонасининг биносидан чиқарган.
Муаллиф: Акилай Курманова
