МХДҚ «ҳукуматни куч билан босиб олиш мақсадида тартибсизлик акцияларини уюштиришни кўзлаган» одамлар қўлга олинганини 6 июлда тасдиқлади.
Маълумотга кўра, 5 июнда умумий 30 киши МХДҚга етказилган. Махсус хизматдан бу гуруҳнинг ташкилотчиси фуқаровий фаол, «Элдик Кенеш» сиёсий партиясининг раиси Роза Нурматова эканини таъкидлашди.
«Унинг раҳбарлиги остида ҳукуматни куч билан босиб олиш режаларини муҳокама қилишда алоқадор шахсларни давлат структураларига қарши ташвиқотга йўналтирилган яширин учрашувлар узлуксиз ўтказилган. Уюшган гуруҳга жамиятнинг турли тармоғидан ва ўлканинг турли ҳудудларидан 100дан ортиқ одам жалб қилинган, уларнинг орасида аниқ вазифалар белгилаб берилган», — дейишди МХДҚдан.
Шунингдек бу гуруҳ йил давомида «сафига талабгорларни қўшиб, ўлкадаги энг норози одамларни жалб қилгани, жамиятда бирор воқеага норозилик бўлганда, зудлик билан ўзларининг жиноий режаларини амалга оширишни кўзлашгани» айтилади.
МХДҚдан гуруҳнинг ташкилотчиси Роза Нурматова ва унинг шериклари Н.Р.С., И.Г.С., М.А.Ж. ва Д.Т.А. «айбини тан олганини» билдиришди.
«Тинтув вақтида уларнинг жиноий ниятини тасдиқлаган буюмлар топилди. Қўлга олинганлар вақтинча сақлаш жойига киритилди. Ҳозирда ишнинг бошқа ҳолатлари ва унга алоқадор одамларни аниқлаш ишлари бормоқда», — дейишди махсус хизматдан.
Бунгача бир қанча ОАВ ҳуқуқни ҳимоя қилиш идораларидаги ўз манбаларига таяниб, «ҳукуматни куч билан босиб олишда гумонланганлар» қўлга олинаётганини ёзган.
«AКИpress» нашри қўлга олиш ишлари Бишкекда бораётганини билдирган. Айрим нашрлар гумондорлар қўлга олинаётгани ҳақидаги видеолар ҳам беришган.
Мана шундай оммавий қўлга олишлар ўтган йилнинг октябрида ҳам бўлган. Унда Кампиробод сув омборини Ўзбекистонга берилишига қарши чиққан 30га яқин фаол ва сиёсатчи қўлга олиниб, уларга «Оммавий тартибсизлик уюштиришга тайёргарлик кўрган» деган айб қўйилган.
Қўлга олинганларнинг ҳаммаси Кампирободни Ўзбекистонга ўтишини очиқ танқид қилгани учун «сиёсий асосда» қамоққа олинганини айтишган.
