Рассом Татьяна Зеленская мудофаа вазирлигининг полковниги томонидан зўравонликка учраганини айтган қўшиқчи Нурчолпон Улуғбек қизини қўллаб, иллюстрация чизди. У иллюстрацияни фейсбукдаги саҳифасига 5 июнда қўйган.
Суратда миллий либосдаги қўшиқчи жилмайиб, жетиген асбобида мусиқа чалаётганини чизган. Ортида Қирғизистоннинг баланд тоғлари тасвирланган.
«Очиқ айтиш билан сиз ўзингиз учунгина эмас, бошқа минглаган қизлар билан аёллар учун ҳам тик турдингиз, сизга ёрқин ғалаба тилайман», — деб ёзди рассом.
Нурчолпон ҳарбийларга бағишланган тадбирда полковник томонидан зўравонликка учраганини 31 майда айтган. У полковникнинг ҳамкасблари ҳам унга тегишишга ҳаракат қилганини таъкидлаган.
Қўшиқчи воқеа бўлгандан кейин милицияга «ариза ёзганини» ва полковник ундан кечирим сўраганини қўшимча қилган.
«Полковник кечирим сўраб қутилиб кетди, мен эса травмамни бир ярим йил даволадим. Натижаси: ўзингиз ва асабингизни эҳтиёт қилинг, бирор иш соғлигимизга арзимайди», — деган у.
Ҳарбий прокуратура эса бу бўйича текширув давом этаётганини билдирган.
Татьяна Зеленская фақат Қирғизистонда эмас, бутун дунёда бўлаётган муҳим мавзуларга чизган суратлари ва иллюстрациялари билан танилган. У ўлкадаги вазиятга ва Украинадаги урушга боғлиқ иллюстрацияларни ҳам кўрсатган.
Зўравонлик кўрсатиш ва жазо
Харассмент ёки зўравонлик — одамнинг шахсий ҳаёти дахлсизлигини бузиб, ноқулайлик яратиб, зарарга олиб келувчи ҳаракат. Унга ушлаш, ўпиш, қучоқлаш ёқимсиз ҳаракатлар киради. Бундан ташқари, сўз билан камситиш ёки қўрқитиш, ёқимсиз хотиралар ёки қўпол ҳазиллар ҳам зўравонлик бўлиб ҳисобланади.
Қирғизистонда қизлар кўчада, ўқишда ёки иш вақтида жинсий зўравонликка учрашади. Статистикага кўра, қирғизистонлик қизларнинг 83% ҳаётида камида бир марта руҳий, жисмоний ёки жинсий зўравонликка учраган. Кўп ҳолларда жабрланувчилар милицияга мурожаат қилишмайди, сабаби жамиятнинг гапига қолишдан қўрқишади.
Қонунда жинсий зўравонликка ҳеч қандай жазо қўлланилмайди. Юрист Фатима Якупбаеванинг айтишича, қоида бўйича бунда «Майда бебошлик» моддаси қўлланилади, унда айбланувчи жамоат ишларига жалб қилиниб, жаримага тортилиб ёки 3-5 суткагача қамалади.
Қонунда зўравонлик қилиш ёки шантаж қилиш билан жинсий ҳаракатларга бориш учун жавобгарлик бор. Бундай ҳолда «Жинсий ҳаракатларга мажбурлаш» ёки «Жинсий зўравонлик ҳаракатлари» моддалари қўлланилади. Аммо буни «видео, аудио, гувоҳларнинг кўрсатмасисиз исботлаб бериш жуда оғир» дейди юрист.
