Жогорку Кенеш депутати Марлен Маматалиев Қирғизистонга ўнг руллик машиналарни олиб киришга рухсат берувчи қонун лойиҳасини таклиф этди. Қонун лойиҳаси 15 февралда жамоат муҳокамасига қўйилди.
Қонун лойиҳасининг муаллифи ушбу давлатнинг автопаркини янгилашга, сифатли автотранспортларни фуқароларга етказиб бериш ҳамда йирик шаҳарлардаги экологик вазиятни изга солишга имконият беради деб ҳисоблайди.
Маматалиевнинг маълумотига кўра, ўнг руллик машиналар мамлакатга асосан Япониядан олиб келинади, уларнинг чиқарилган йили ҳамда техник кўрсатгичлари бошқа ўлкалардан ички бозорга олиб келинган чап руллик автомобилларга нисбатан бир қанча яхши.
«Бундан ташқари, «яхши сақланган» автотранспорт воситасини фойдаланиш умумий экологияга ижобий таъсир кўрсатиб, республика миқёсидаги шаҳарларда қора тутун муаммосини ҳал қилади», — дейилган маълумотнома-асосномада.
Депутат ўнг руллик автомобилларни бошқариш учун албатта қувиб ўтиш камераси (монитори бор) билан жиҳозланиш шарти қўйилиб олиб келишни тавсия этди. Унинг таъкидлашича, қувиб ўтишда бу автомобилларни кўриш муаммосини ҳал қилиб, транспорт ҳодисаларининг сонини қисқартиради.
Қирғизистонга ўнг руллик автомобилларни олиб кириш 2015 йили таъқиқланган. Ушбу қарорни ўша вақтдаги ҳукумат ўнг руллик автомобиллар қувиб ўтишда ҳайдовчининг чап томони кўринмагани туфайли транспорт ҳодисаларига учрамоқда деб асослаган.
Коммунал, қишлоқ хўжалиги, йўл қурилиши ҳамда бошқа мақсадларда чиқарилган транспорт воситалари таъқиқланмаган.
15 февралда вазирлар маҳкамаси раиси Акилбек Жапаров чекловни олишга қарши эканини билдирган. У ўнг руллик машиналарни олиб келишга рухсат берилса, унда мамлакатга «Россия, Беларус ва Қозоғистонда таъқиқланган автомобилларнинг ҳаммаси тўлиб кетади» деб ҳисоблайди.
