Қирғизистон жанубида COVID-19 юқтирганларнинг сони кескин ўсмоқда. Бу ҳақда Соғлиқни сақлаш министри Алимкадир Бейшеналиев 26 октябрда ўтган матбуот анжуманида билдирди. Унинг айтишича, бундай кўриниш ўлкадаги сиёсий воқеаларга боғлиқ бўлиши мумкин.
«Соғлиқни сақлаш вазирлигининг комиссияси эпидемиологик ҳолатни ўрганиш мақсадида Ўш, Жалолобод ва Баткен вилоятларига бориб келди. Инфекцияга чалинганларнинг сонини ўсишига октябрнинг бошида бўлган воқеалар, сайлов олди тадбирлар сабаб бўлиши мумкинлигини аниқладик», — деб айтди Бейшеналиев.
Унинг маълум қилишича, фуқаролар тўп-тўп бўлиб йиғилиб, санитар қоидаларга амал қилишмаган.
«Қирғизистонликлар жамоат жойларида масофани сақлашмайди, ниқоб тақишмайди. Биз мана шу қоидаларга амал қилмаганлар учун жазони кучайтириш учун ва оммавий тадбирларни тақиқлаш мақсадида ҳукумат билан сўзлашув олиб борамиз», — деб билдирди муассаса раҳбари.
Бейшеналиев коронавирусга чалинганларнинг сони ўсишига ҳукумат тайёргарлик кўраётганини ва беморларни даволаш учун койка ўринлар тайёрланаётганини қўшимча қилди.
«Коронавирус билан оғриганларни даволаш учун 8 163 койка ўрин тайёрладик. Улардан 366 ўрин — жонлантириш бўлимида. Керак бўлган вақтда қўшимча койкаларни очишга тайёрмиз», — деди Бейшеналиев.
COVID-19 юқтириш ҳолатларининг ўсиши
Сентябрнинг охиридан бошлаб Қирғизистоннинг жанубий ҳудудида коронавирусга чалинганларнинг сони ошмоқда. Октябрь ойида эса COVID-19 юқтирганлар сони бир неча марта кўпайган.
2020 йилнинг 26 сентябрига кўра статистика:
- Ўш — 9;
- Ўш вилояти — 22;
- Жалолобод вилояти — 34;
- Баткен вилояти — 43.
2020 йилнинг 26 октябрига кўра статистика:
- Ўш — 32;
- Ўш вилояти — 51;
- Жалолобод вилояти — 112;
- Баткен вилояти — 49.
Жалолобод вилояти касалликка чалинганлар бўйича Қирғизистонда иккинчи ўринда туради. Пандемия бошлангандан бери бу вилоятда COVID-19 6 585 одамда аниқланган.
Учинчи ўринда Ўш вилояти — бу ерда коронавирус инфекцияси 6 327 кишида тасдиқланган.
Баткен вилоятида инфекция умумий 4 951 беморда аниқланди.
26 октябрга кўра Қирғизистонда COVID-19 юқтирганларнинг сони 56 170га етди.
