Айрим ОАВлар 10 июнда қирғиз-ўзбек чегарасида чиққан жанжалда жабрланган Боткен вилоятининг Қадамжой туманидаги Чечме қишлоғининг 49 ёшдаги турғуни Айтбай Акинов вафот этганини ёзиб чиқди.
Соғлиқни сақлаш вазирлигининг матбуот котиби Жилдиз Айгерчинова «Клооп»га Акинов чегарадаги тўқнашувларга қатнашганини, аммо жабрланганлар орасида бўлмаганини билдирди.
“У жабрланганлар орасида бўлмаган. Вафот этган киши ўша ерда инсульт бўлган. Аввал ҳам инсульт бўлган экан», - деб тушунтирди Айгерчинова.
Чегарадаги можаро
Можаро 31 майда Қирғизистоннинг Чечме қишлоғи ва Сўх анклавидаги Чашма қишлоғи аҳолиси ўртасида аниқланмаган ҳудудда жойлашган Чечме булоғини талашишдан бошланган. Натижада 25 қирғизистонлик турли хил тан жароҳатлари олган - уларнинг 21 нафари тиббий ёрдам кўрсатилиб уй шароитида даволаниш учун чиқарилган.
Тўрт нафар фуқаро эса оғир аҳволда Айдаркен шаҳридаги касалхонага ётқизилган. Иккаласининг аҳволи оғир бўлган. Ҳозирда уч бемор шифохонадан чиқарилиб, бир бемор даволанишни умумий палатада давом эттирмоқда.
Ўзбекистон ҳукумати чегарадаги тўқнашувларда Сўх анклавининг 187 фуқароси жароҳат олганини хабар қилди. Улардан ўн беш нафари касалхонага ётқизилиб, беш киши реанимация бўлимига ўтказилган.
Жанжал вақтида икки давлат турғунларининг уйлари ёқилиб, айрим қирғизистонликларнинг машиналари пачақланган.
Можаронинг эртасига вице-премьер Кубатбек Боронов Боткенга бориб Ўзбекистоннинг премьер-министри Абдулла Арипов билан сўзлашувларни олиб борган. Шунингдек икки давлат президентлари — Жээнбеков ва Мирзиёев — телефон орқали суҳбатлашиб, бундан кейин жанжалларга йўл қўймаслик бўйича барча зарур чораларни кўришга келишган.
Шунингдек Ўзбекистон президенти Шавкат Мирзиёев «Сўхдаги воқеа қирғиз халқи билан бўлган дўстлик алоқаларига таъсир кўрсатмаслиги керак» эканини таъкидлаган.
