Бакаев кўчасида икки ўқувчини уриб кетгани учун айбланаётган ҳайдовчи икки ойга ТИЗОга қамоққа олинди. Ўқувчиларнинг бири ҳамон ҳушига келмаган.
Назорат милициясининг матбуот маркази ходими Таалай Бугубаев Kloop.kgга Ленин район судининг қарори билан ҳайдовчи қамоққа олиниб, тергов битгунча ТИЗОга киритилганини хабар қилди.
Ушланган ҳайдовчининг автомашинаси жарима майдонига етказилди. Тергов давом этмоқда.
Жабрланган болаларнинг бири ҳамон ҳушига келмаган. Иккинчи боланинг аҳволи қониқарли, у ўзи мустақил овқатланяпти.
Интернетда мурожаат қабул қилиниб, унинг ташкилотчилари ҳукуматдан давлат йўлларининг хавфсизлигини таъминлашни талаб қилишмоқда.
Мурожаатнома ташаббусчиларидан бири Назира Бейшеналиева Kloop.kgга ҳукумат «Хавфсиз шаҳар» лойиҳасини амалга ошириб, бу бўйича маълумот бериши кераклигини айтди.
Унинг сўзларига кўра, мазкур лойиҳа 2006-йили амалга оширила бошлаган, уни президент Алмазбек Атамбаев ўз назоратига олган, бироқ ҳозиргача натижа йўқ.
«Одамлар боласини мактабга жўнатиб, “Тирик қайтармикан, биров уриб кетмасмикин?” - деб хавотирланишади. Биз петиция туздик, унга бир неча ой ичида амалга оширса бўладиган аниқ мақсадлар бор», — деди у.
Унинг таъкидлашича, мурожаатга депутат Жанар Акаев эътибор қаратиб, бу масалани парламент муҳокамасига чиқармоқчи.
Ўқувчиларни уриб кетгани
21-апрель куни кундази Бишкекда Бакаев (собиқ Чапаев) кўчасида қора-кўк рангдаги «Мерседес-Бенц»нинг ҳайдовчиси пиёдалар йўлидан ўтаётган учинчи синфнинг икки ўқувчисини уриб кетган.
Ҳайдовчи воқеа бўлган жойдан яширинишга улгириб, кейинчалик автомашинаси Селекция қишлоғи яқинида топилди.
Болалар оғир аҳволда шаҳар болалар касалхонасига етказилган.
Ўқувчилардан бирининг мияси чайқалиб, чап қўли синиб, ички органлари жароҳатланган.
Иккинчи ўсмирнинг мияси қаттиқ чайқалиб, икки оёғининг тиззасидан пасти ва бўйин умуртқаси синиб, ички органлари жароҳатланган. Чап ёнбоши лат еган.
21 апрель куни кечда гумондор шахс милицияга ўз айбини тан олиб ўзи келган. Ушланган ҳайдовчи икки йил аввал Киркомстром томонда бир эркак кишини уриб кетгани ва у киши вафот этгани аниқланди.
Муаллиф: Александра Титова
