Чуй вилоятининг Сокулук туманида маҳаллий бренд остида автомобиллар ишлаб чиқарилувчи завод қурилмоқда. Бу ҳақда «Биринчи Радио» эфирида Иқтисодиёт вазирлиги саноат сиёсати бошқармаси раҳбари Арслан Базиев маълум қилди.
Базиевнинг сўзларига кўра, кўплаб қирғизистонликлар республика қачон ўз бренди билан автомобиллар ишлаб чиқаришни бошлашини сўрашган.
«Биз Сокулукда яна бир завод қурмоқдамиз, унинг қурилиши “Jaecoo” компанияси билан ҳамкорликда амалга оширилмоқда. Агар ҳаммаси яхши кетса, келаси йилда завод ишга тушади ва шу орқали ўз брендимизни яратамиз», — деди у.
Базиев айрим фуқароларнинг мамлакатда «фақат йиғув» амалга оширилаётгани ҳақидаги эътирозларига ҳам жавоб берди.
«Автомобил ишлаб чиқариш — ўзига хос соҳадир. Бир компания дарҳол тўлиқ ишлаб чиқариш жараёнини йўлга қўя олмайди. Шунинг учун биз бу жараённи уч босқичга ажратдик: йирик узелли йиғув, майда узелли йиғув ва локализация. Ўзбекистон локализация босқичига 30 йилда эришди. Бу мураккаб жараён», — дея тушунтирди у.
JAECOO — бу 2023 йилда Chery компаниясининг OMODA шўъба корхонаси томонидан ишлаб чиқарилган флагман автомобили.
Бундан олдин Бош вазир Ақилбек Жапаров Норин вилоятида «Нарин Шумкар» автойиғувчи завод қурилиши учун капсула қўйган эди. Ўшанда у ҳукумат ушбу заводга $130 миллион инвестиция киритиши ҳақида маълум қилган. Унинг сўзларига кўра, корхона йилига 20 мингдан ортиқ автомобил ишлаб чиқариши кутилмоқда.
