Сўнгги кунларда Бишкекда ҳаво сифати кескин ёмонлашди. Масалан, бугун пойтахт бир неча соат давомида World Air Quality рейтингида дунёдаги энг ифлосланган бешта шаҳар қаторига кирди.
Мониторинг маълумотларига кўра, 25 ноябрь куни соат 12:00 да ҳаводаги PM2.5 (зарарли қаттиқ заррачалар ва кичик суюқ томчилар) концентрацияси ЖССТнинг ҳаво сифати бўйича тавсия этилган ўртача йиллик миқдоридан 20,9 баравар юқори бўлган. Ҳаво сифати ҳолати «зарарли» деб баҳоланди.
Бундай шароитда Бишкек аҳолисига ниқоб тақиш ва ташқарида жисмоний фаолиятдан қочиш тавсия этилади. Уйда эса ифлос ҳавонинг кириб келмаслиги учун ойналарни ёпиш ва ҳаво тозалагични ишга тушириш тавсия қилинади.
Энергетика вазирлиги ҳозирча Бишкекдаги туман ҳолати юзасидан «Клооп»га изоҳ бермади.
Материал нашр этилган пайтда, мониторингга кўра, Бишкекда ҳаво сифати бироз яхшиланди: пойтахт ҳаво ифлосланиши бўйича шаҳарлар орасида 13-ўринни эгаллади.
Октябрь ойининг бошида энергетика вазири Талайбек Ибраев шаҳар аҳлига бу қиш пойтахтда туман бўлмаслигини ваъда қилган эди. Унинг сўзларига кўра, шаҳарда ҳаво ифлосланишининг асосий манбалари — ҳаммомлар ва дизелда ҳаракатланувчи автобуслар йўқ қилинган. Шунингдек, Ибраев уйларни газлаштириш ишлари олиб борилаётганини ва ИЭС қайта таъмирланаётганини айтган эди.
