Ростов-на-Дону шаҳрида меҳнат қуллигидан қутқарилганлар орасида аввал Россия томонида Украинада жанг қилган қирғизистонлик Рустамжон Ғолимов ҳам бор эди. Бу ҳақда Don Mash телеграм-канали хабар берди. Канал маълумотларига кўра, қулликда бўлган даврида Ғолимовнинг Россияда қонуний бўлиш муддати тугаган, шунинг учун суд уни она юртига депортация қилишга қарор қилган.
«Энди менинг ишончли шахсимни ўз юртига депортация қилиш таҳдиди бор, у ерда унга [ёлланма жангчи бўлгани учун] 10 йилгача озодликдан маҳрум этиш хавфи мавжуд. Бунинг барчаси суднинг вазиятни тўлиқ тушунмай, шошилинч қарор қабул қилгани сабабли юз бермоқда […] Биз унга ёрдам берамиз. Айниқса, менинг ишончли шахсим СВО ҳудудида [Украинага Россиянинг босқинчилиги] Россия учун хизмат қилиш ва ҳимоя қилишни давом эттиришни хоҳлаяпти», — деди адвокат Ҳасан Ражабов журналистларга.
Ғолимовнинг сўзларига кўра, у 2022 йилда ихтиёрий равишда Украина ҳудудига хизмат қилиш учун келган. Жароҳат олгандан сўнг у Ростовга келган, у ерда иш топишга ҳаракат қилган, аммо қулликка тушиб қолган — барча ҳужжатларини олиб қўйишган.
Қирғизистон Ташқи ишлар вазирлиги ҳозирча бу маълумотга изоҳ бергани йўқ.
Россия томонида Украинада жанг қилиб, ёлланма жангчи сифатида ҳукм қилинган биринчи қирғизистонлик Аскар Кубоничбек ўғли бўлди. Аввалига у 10 йил озодликдан маҳрум этиш жазосига ҳукм қилинган, аммо кейинчалик иш қайта кўриб чиқишга юборилган. Натижада унинг жазоси юмшатилиб, 7 йил озодликдан маҳрум этишга ҳукм қилинган ва суд залида озод қилинган. Унга уч йиллик пробацион назорат берилган.
Шунга қарамай, апрель ойининг охирида Кубоничбек ўғли Россияга кетган. Кейинчалик маълум бўлдики, у Россия Мудофаа вазирлиги билан янги шартнома имзолаган ва Россия фуқаролигини олган.
