Жогорку Кенешнинг ҳуқуқ-тартибот, жиноятчиликка қарши кураш ва коррупцияга қарши чоралар қўмитаси 22 октябрь куни милиция ходимларини видеога олишни тақиқловчи қонун лойиҳасини биринчи ўқишда маъқуллади.
Ҳужжат ташаббускорларининг фикрича, фуқаролар милиция ходимларининг иштирокидаги фото ва видеоларни ижтимоий тармоқларда тарқатиб, уларни обрўсизлантириш мақсадида фойдаланмоқдалар.
Шу тариқа, милиция ходимларининг фотосуратларини ёки видеоларини суратга олиш ва ижтимоий тармоқларда тарқатган фуқаролар 5 минг сом жарима ёки 5 дан 7 кунгача қамоқ жазоси билан жазоланиши мумкин.
Шунингдек, депутатлар Қирғизистон Республикасининг Жиноят кодексидаги «Безорилик» моддасини тўлдиришни таклиф қилмоқдалар. Бу моддага ҳокимият вакили ёки жамоат тартибини сақлаш бўйича хизмат мажбуриятларини бажараётган шахсга нисбатан кўрсатилган қаршилик билан содир этилган безорилик учун жазо киритиш таклиф қилинган. Бундай ҳолларда жарималар 50 мингдан 200 минг сомгача ёки 5 дан 7 йилгача озодликдан маҳрум этиш жазоси тайинланиши мумкин.
