2024 йил 3 сентябрь куни Ички ишлар вазирлиги ҳокимиятни зўравонлик йўли билан эгаллашга очиқ чақириқлар ва экстремистик материалларни тарқатганлик учун озодликдан маҳрум қилиш муддатини узайтиришни таклиф этди.
«Қирғизистон Республикасининг айрим қонун ҳужжатларига ўзгартиш киритиш тўғрисида»ги қонун лойиҳаси жамоатчилик муҳокамасига қўйилди.
Муассаса маълумотларига кўра, сўнгги пайтларда «айрим радикал гуруҳлар ва ташкилотлар фаоллашиб, давлатлар ва уларнинг фуқаролари хавфсизлигига таҳдид солувчи, ҳатто конституциявий тузум асосларига путур етказиш даражасигача бўлган бузғунчи мақсадларни кўзламоқда».
Шундай қилиб, ИИВ ҳокимиятни зўравонлик йўли билан эгаллашга даъват қилганлик учун уч йилдан беш йилгача озодликдан маҳрум қилишни таклиф этмоқда. Ҳозирги кунда бу ҳаракатлар учун катта жарима ёки уч йилгача озодликдан маҳрум қилиш жазоси мавжуд.
Агар жиноят гуруҳ томонидан, интернет ёки ОАВ орқали содир этилган бўлса, вазирлик беш йилдан етти йилгача озодликдан маҳрум қилишни таклиф қилмоқда.
Бундан ташқари, вазирлик «радикал мафкураларга мойил бўлган ота-оналар таъсири остида бўлган балоғатга етмаганларни экстремистик ташкилотларга жалб қилиш ҳолатлари кўпайганини» қайд этди.
Шу тариқа, ИИВ экстремистик материалларни сақлашда икки марта қўлга тушган шахсни жиноий жавобгарликка тортиш учун модда қўшишни таклиф этмоқда. Биринчи марта фуқарога огоҳлантириш берилади, иккинчи марта эса уни уч йилгача озодликдан маҳрум қилиш мумкин.
Экстремистик материалларни тайёрлаш ва тарқатганлик учун беш йилдан етти йилгача озодликдан маҳрум қилиш жазоси белгиланган. Агар жиноят гуруҳ томонидан содир этилган бўлса, етти йилдан ўн йилгача озодликдан маҳрум қилиш мумкин.
