Вазирлар Маҳкамаси раҳбари Ақилбек Жапаров икки ҳафта муддатда сейсмологик хусусиятларни ҳисобга олган ҳолда мамлакатимиз қурилиш индустриясини ислоҳ қилиш дастури лойиҳасини ишлаб чиқишни топширди. Бу ҳақда ҳукумат матбуот хизмати хабар берди.
Аввалроқ Жапаров Қирғизистонда техник қоидабузарликлар билан қурилган ва фуқаролар ҳаётига хавф туғдирадиган уйлар бузилишига ишонтирган эди.
Сейсмик қурилиш бўйича халқаро экспертлар ассоциацияси президенти Улугбек Бегалиевнинг айтишича, Қирғизистонда қарийб 40 йилдан бери биноларнинг зилзилага чидамлилиги синовлари ўтказилмаган. Унинг маълумотига кўра, мамлакатда сейсмик қаршиликни текшириш учун ишлатилиши мумкин бўлган учта тебраниш машинаси мавжуд.
6 февраль куни Туркия ва Сурияда иккита кучли зилзила юз берди. Зилзила эпицентри мамлакат жануби-шарқидаги Газиантеп шаҳридан 26 км узоқликда, Сурия билан чегара яқинида жойлашган.
Ҳар икки мамлакатда табиий офат қурбонлари сони 45 минг кишидан ошиб, яна юз минглаб одамлар жабрланди. Минглаб бинолар бутунлай вайрон бўлган.
Шу фонда Қирғизистонликлар мамлакат пойтахтидаги тартибсиз қурилиш муаммоси ҳақида гапира бошладилар. Шу тариқа Президент Садир Жапаров мустақиллик йилларида Бишкекда қурилган кўп қаватли уйларнинг сифати паст эканини айтди. У бундан кейин тартибсиз ривожланиш бўлмайди, янги уйларнинг сифати давлат назоратида бўлишини ваъда қилган.
