АҚШ Халқаро тараққиёт агентлиги (USAID) соғлиқни сақлашни қўллаб-қувватлаш дастурлари учун 4 миллион доллар ажратмоқчи. Бу ҳақда Соғлиқни сақлаш вазирлиги матбуот хизмати хабар берди.
Хабарда айтилишича, 15 февраль куни Соғлиқни сақлаш вазири Гулнора Баатирова USAID маъмуриятининг ўринбосари Исобел Коулман билан сил, COVID-19, ОИВ/ОИТСга қарши кураш ва соғлиқни сақлаш тизимини мустаҳкамлаш бўйича қўшма ташаббусларни муҳокама қилган.
«USAID Қирғизистонга янги таҳдидлар ва юқумли касалликлар авж олиш хавфини камайтириш, шунингдек, уларнинг оқибатларига қарши курашиш учун маблағ мавжуд бўлган тақдирда 4 миллион доллар қўшимча маблағ ажратишни режалаштирмоқда. Ушбу маблағ соғлиқни сақлаш тизимини мустаҳкамлаш ва аҳоли саломатлигини муҳофаза қилиш бўйича фавқулодда вазиятларга тайёрликни оширишга йўналтирилади», — дейилади вазирлик хабарида.
Баатйрова, ўз навбатида, USAIDга доимий ёрдами учун миннатдорчилик билдириб, Соғлиқни сақлаш вазирлиги ушбу ташкилот билан ҳамкорликни давом эттиришига ишонтирди.
USAID 1992 йилдан бери Қирғизистон билан ҳамкорлик қилиб, умумий демократик қадриятларни илгари суриш, қонун устуворлигини таъминлаш, иқтисодиётни ривожлантириш, соғлиқни сақлаш ва таълимни яхшилаш, давлат бошқаруви институтларининг ролини кучайтиришга кўмак бериб келмоқда.
