21 июль куни Иссиқкўлнинг Чўлпон-Ота шаҳрида Президент Садир Жапаров Тожикистон Президенти Имомали Раҳмон билан учрашди. Бу ҳақда президент маъмурияти хабар берди.
Маълумотларга кўра, йиғилишда Қирғизистон ва Тожикистон давлат чегарасини делимитация ва демаркация қилиш бўйича ҳукуматлараро комиссия ишини фаоллаштиришга келишиб олинди.
Икки давлат президентлари чегара ҳудудларидаги трансчегаравий дарёларнинг сув ресурсларидан ўзаро самарали фойдаланиш бўйича ҳамкорликни жонлантириш муҳимлигини ҳам қайд этдилар.
Томонлар сув ресурсларидан фойдаланиш бўйича икки томонлама масалаларни кўриб чиқиш соҳасида идоралараро қирғиз-тожик ишчи гуруҳи фаолиятини давом эттиришга қарор қилдилар.
Бундан ташқари, Садир Жапаров ва Имомали Раҳмон икки томон манфаатларини инобатга олиб, муаммоларни сиёсий-дипломатик музокаралар йўли билан тинч йўл билан ҳал этиш зарурлигини таъкидладилар.
Қирғизистон-Тожикистон чегарасининг узунлиги 972 километрни ташкил қилади. Чегаранинг аниқланмаган участкаларида сув ва ер ресурсларидан фойдаланиш, чегарани ноқонуний кесиб ўтиш билан боғлиқ можаролар туфайли қўшни қишлоқларда тез-тез тўқнашувлар содир бўлиб туради.
2021 йил апрель ойида энг йирик қуролли тўқнашув бошланди ва Қирғизистоннинг 36 фуқароси ҳалок бўлди. Тожикистондан эса 19 киши ҳалок бўлгани айтилди.
Жорий йилнинг апрель ойида президент Садир Жапаров қирғиз-тожик чегарасининг 664 километри аниқланганини, Тожикистон президенти Имомали Раҳмон эса 663,7 километр чегара келишилганини айтган эди.
