Бош прокурор Ўткурбек Жамшитов 17-апрелда парламентда ҳисобот берар экан, «Акнет» интернет провайдери устидан текширув давом этаётганини билдирди. Жамшитов ҳозир суд жараёнида уч жиноят иши бор эканини айтди.
У Финполнинг ходими «Акнет»нинг вакилидан гўёки пул таъма қилаётгани акс эттирилган видео лавҳани ҳам эслаб ўтди.
«Интернетда тарқаган видеоматериал бўйича биз финполга сўров жўнатдик, уларнинг текшируви натижасига кўра ҳуқуқий баҳо берамиз», — деди у.
Видео лавҳа интернетда 10-апрель куни пайдо бўлган. Унда номаълум одамлар «Акнет»нинг идорасига келиб, компаниянинг раҳбариятига таҳдид қилишгани акс этган.
Видеода икки одам кўринади: бири «Акнет»нинг вакили, иккинчиси эса номаълум шахс. Иккинчи одам интернет провайдернинг вакилини қўрқитиб, ундан ширкатнинг 2017 йилдан бошлаб 2018 йилгача бўлган даромадидан пул тўлаб беришни талаб қилган. Номаълум одамнинг айтишича, у компания улушининг 33 фоизини олган. Шунингдек у «Акнет» сотиб бериши керак бўлган 2018 йилги «Лексус-570» русумидаги автомобилни талаб қилган.
Номаълум киши компаниянинг юристини жазолаб, ундан ташқари, «Акнет»га МҲДҚнинг ва молия полициясининг вакилларини жўнатаман деб қўрқитган.
Молия полициясидан нима дейишмоқда?
Видео лавҳа тарқаб кетгандан бир неча кундан кейин молия полицияси ўзининг расмий баёнотини эълон қилган. Идорадагилар интернетга «монтажланган ва суҳбатнинг контекстидан олинган парчалар» эълон қилиняпти деб ҳисоблашади.
Компаниядаги тинтувлар
2018 йили январнинг сўнгида молия полицияси «Акнет» компаниясида тинтув ўтказган. Унда компания буни «рейдерлик босиб олиш» деб атаб, «Акнет»нинг кабелли телевидениеси ва интернети ёмон ишлай бошлаган.
Бу биргина интернет фойдаланувчиларига таъсир этиб қолмай, давлат органларининг ишига ҳам халал берган, чунки уларнинг аксарияти «Акнет» провайдерининг интернетидан фойдаланишади.
Молия полициясидан билдирилишича, «Акнет»га нисбатан жиноят иши акционерлардан бири Руслан Абдумажитовнинг даромадни оз кўрсатиш, солиқ тўлашдан қочиш ҳамда акционерларга дивидендларни тўламай қўйиш фактлари бўйича берган аризасининг асосида қўзғалган.
«Акнет»нинг асосчилари бўлиб Кубан Ажимудинов, Аскар Кутанов ҳамда Руслан Абдумажитов ҳисобланади. Фирмани Кубан Ажимудинов бошқаради. Унинг ва ижрочи директори бўлиб ишлаган Руслан Абдумажитовнинг ўртасида улушларни ва даромадларнинг қисми бўйича тортишувлар юзага келган.
Финпол компаниянинг ҳисобларини ҳибсга олиб, солиқ текширувини тайинлаган. Аммо бир қатор илтимослардан кейин асосий ҳисоб ҳибсдан чиқарилган.
«Давлат органларини ва республиканинг аҳолисини интернетдан ўчириш каби кутилмаган салбий вазиятларга йўл бермаслик учун ҳисобни қамоқдан чиқариш қарори олинди, натижада компания тўхтовсиз ишлашда давом этди», — деб айтилади финполнинг пресс-релизида.
Текширув вақтида компания бунгача яшириб қўйган 150 млн сом солиқни бюджетга тўкиб бериб, финпол жиноят ишларини ёпган.
Бироқ 27-мартда Бош прокуратура тўрт жиноят ишини тўхтатиш бўйича молия полициясининг қарори ортга қайтарилганини билдирган. Ҳозир бу ишларнинг устидан ИИВнинг тергов хизмати иш олиб бормоқда.
