Бишкекдаги «Оберон» бозорларининг эгаси Нуржамал Байболова кассация шикояти билан Олий судга мурожаат қилди. У судьялардан маъмурий ва шаҳар судининг қарорларини қайта кўриб чиқишни сўрамоқда, деб ёзади «Азаттиқ» радиоси.
Байболованинг журналистларга айтишича, у кейинчалик Конституциявий судга ва халқаро ташкилотларга мурожаат қилишни режалаштирмоқда.
Байболованинг шикояти қачон Олий судда кўриб чиқилиши ҳозирча номаълум.
Октябрь ойининг охирида МХДҚ «Оберон» бозорлари, Дордой ва Орто-Сой бозорларида жойлашган бозорлар Бишкек шаҳар ҳокимияти мулкига ўтганини хабар қилди. Уларнинг маълумотига кўра, бу ерлар 1998 йилда «Оберон» хусусий компаниясига ноқонуний равишда хусусий мулк сифатида берилган.
Махсус хизматларга кўра, аввал бошда «Оберон»нинг эгалари ер участкаларини ижарага олган, аммо кейинчалик, «мансабдор шахслар билан тил бириктириб», хусусий мулк ҳуқуқи тўғрисида давлат актларини олишган.
Шундан сўнг шаҳар ҳокимияти ер участкаларининг ноқонуний берилган қарорларини ҳақиқий эмас деб тан олиш тўғрисида судга даъво киритган. Натижада Бишкек маъмурий суди ва пойтахт шаҳар суди даъвони қаноатлантирган.
Байболова ўшанда давлат ва унинг мансабдор шахслари томонидан мулкдорлар ва тадбиркорларга нисбатан олиб борилаётган «зўравонлик ва талончилик сиёсати»нинг навбатдаги эпизоди деб атаган.
