Ўтган ҳафтада TikTok'даги пости учун қўлга олинган ижтимоий тармоқнинг фойдаланувчиси Айтилек Орозбеков 2025 йилнинг 1 январига қадар ТИЗО-1да қамоқда бўлади. Мазкур қарорни МХДҚ терговчисининг илтимосини қаноатлантирган Бишкекнинг Биринчи май туман суди 2 ноябрда қабул қилди.
Суд матбуот хизматига кўра, Орозбековга ОАВ ёки ахборот-коммуникация тармоқлари орқали зўравонлик билан ҳокимиятни эгаллашга чақириқлар учун (Қирғизистон Жиноят кодексининг 327-моддаси 2-қисми 1-банди) айб қўйилган.
Унинг дўстининг «Азаттиқ»қа маълум қилишича, Орозбековни 1 ноябрда МХДҚ ходимлари TikTok’да жойлаштирилган видеоролик сабабли қўлга олишган. Унинг таъкидлашича, видеороликлар жойлаштирилган «Время покажет» каналида ҳозирда ҳеч қандай видео йўқ. Орозбековга ушбу видеороликлар ва «Бутун Қирғизистон» партияси аъзоси бўлгани учун ҳибсга олинганини расман маълум қилишган. У қирғиз-турк «Анадолу» таълим муассасасида ўқитувчи бўлган, яқинда у ердан кетган ва иш қидираётган эди.
Адвокат Исмоил Каримжановнинг сўзларига кўра, Орозбеков айбини тан олмаган ва ҳеч қандай чақириқ қилмаганини айтган. «Яқин кунларда унинг постлари экспертизага юборилади, бу билан чақириқлар бўлган ёки йўқлигини аниқлайдилар», — деди адвокат.
Орозбековнинг қариндошларига кўра, у аввал Жогорку Кенеш депутати Эрулан Кўкуловнинг жамоатчилик ёрдамчиси сифатида ишлаган, кейин эса мухолифат партияси «Бутун Қирғизистон»га аъзо бўлган.
Сўнгги йилларда Қирғизистонда «Оммавий тартибсизликлар», «Зўравонлик билан ҳокимиятни эгаллашга чақириқлар», «Ҳокимиятни зўравонлик билан эгаллаш», «Ирқий, этник, миллий, диний ёки ҳудудлараро адоватни қўзғатиш» моддалари бўйича жиноий таъқибларга дучор бўлаётган одамлар сони ошмоқда.
Яқинда «Клооп»нинг маълумотлар бўлими сўнгги тўрт йилда ушбу моддалар бўйича 140 киши қамоққа олингани ҳақида тадқиқот эълон қилди. Улар орасида нафақат журналистлар ва сиёсатчилар, балки фаоллар ва оддий ижтимоий тармоқ фойдаланувчилари ҳам бор.
