Бу ҳақда 21 октябрь куни бўлиб ўтган парламентнинг ижтимоий сиёсат бўйича қўмитаси йиғилишида Соғлиқни сақлаш вазири ўринбосари Медерабек Исмоилов маълум қилди.
Унинг сўзларига кўра, сентябр ойи бошидан бошлаб соғлиқни сақлаш ходимларининг маоши оширилган: шифокорларники — 50%га, ҳамшираларники — 20%га ва кичик тиббиёт ходимлариники — 10%га. Аммо у маош ошириш масаласи ҳали якунланмаганини қўшимча қилди.
Депутат Айбек Маткеримов Қирғизистонда нечта шифокор ишлаши ва уларнинг ҳаммасига маош 50%га оширилганми, деб сўради.
«Штат бўйича 17 минг шифокор ишлайди, амалда эса 12 мингдан ортиқ. [...] Бирламчи тиббий ёрдам кўрсатадиган шифокорларнинг маоши оширилди», — деди вазир ўринбосари. Унинг айтишича, бундай шифокорлар сони 10 мингдан ортиқ.
Депутатнинг ўртача маош ҳозир қанча эканлиги ҳақидаги саволига Исмоилов ёш мутахассисларнинг маоши 25 минг сомга етганини жавоб берди. Шунингдек, тоғли ҳудудларда ишлайдиган ва тажрибага эга шифокорлар 40-50 минг сом маош олишини таъкидлади.
«Гапингизни тўғри айтиб ўтинг, шунда тиббиёт ходимлари ва ўқишни якунлаган мутахассислар дарҳол тушунишади: маош етишмаётган мутахассисларга (хусусан, узоқ ҳудудлардаги) оширилмоқда. Шифокорлар бизга бу нотўғри деб ёзишмоқда», — деди норозилик билан депутат.
Июль ойида президент Садир Жапаров тиббиёт ходимлари маошини 1 сентябрдан ошириш тўғрисидаги фармонга имзо чеккан эди. Ўша вақтда Соғлиқни сақлаш вазири Алимқадир Бейшеналиев Қирғизистонда 10 минг кишига 17,5% шифокор тўғри келади деб маълум қилган ва шу муносабат билан маошларни ошириш зарурати туғилганини айтган.
