Норин вилоятининг Жумғал туманидаги Чаек қишлоғида уч ой аввал 10 млн 750 минг сомга ётқизилган йўлнинг сифатидан аҳоли норози бўлишмоқда. Бу ҳақда 2 февралда «Турмуш» нашри ёзди.
Чаек қишлоғининг аҳолиси асфальт йўл тўлиқ якунланмай, марказий кўчанинг охирига ва бошига асфальт ётқизилиб, ўртаси эса қолиб кетганини айтишди. Шунингдек, улар «эски асфальт устидан янгиси ётқизилганидан» шикоят қилишмоқда.
«Бу йўлни қабул қилиб олган туман йўл хизмат кўрсатиш муассасаси нимага қараб ўтирибди, билмайман? Шундай чала битган йўл ҳам бўладими? Миллионлаб пулга асфальт юклаб келиб ташлаб қўйишди. Машиналар трамплиндан ўтггандай ўтишмоқда. Ҳайдовчи, такси хизматидагилар ҳам норози», — деди қишлоқ турғуни Жилдизбек Актаев.
Жумгал туман № 24 йўл хизмат кўрсатиш ишхонасининг бош муҳандиси Тариел Садиков 2 февралда «Клоопг»га изоҳ бериб, турғунларнинг норозилигини «провокация» деб атади.
Садиковнинг айтишича, ўтган йили йўл қуриш бўйича 10 млн 800 минг сомга тендер эълон қилиб, уни 10 млн 795 мингга «Эмирхан Курулуш» компанияси ютиб олган.
«Лойиҳа бўйича янги асфальт эски асфальтнинг устига босилган. 2020 йили тендерга берганда пандемия бўлиб қолиб, молиялаштириш бўлмай йўлнинг қурилиш ишлари тўхтаб қолган. 2023 йилнинг режасига фақат 1,5 чақиримигина киритилган. Ўртада 2-3 чақирим қолди. У кейинги йилнинг титул режасига кирса, тўлиқ якунланади. [...] Аслида Чаекда провокаторлар кўп», — деди Садиков.
Бунга қадар, Тўқмоқ шаҳрининг турғунлари ўтган йили ноябрда шаҳарнинг Слободская кўчасига ётқизилган асфальт йўл бузила бошлаганини айтиб шикоят қилишган.
Слободская кўчасининг узунлиги 1450 метр бўлса, эни 6 метрни ташкил қилади. У ерга умумий қалинлиги 6 сантиметрни ташкил қилган асфальт босилган.
