Бишкек Иссиқлик электр марказидаги 2 январга ўтар кечаси содир бўлган авария билан боғлиқ у ерда фавқулодда ҳолат эълон қилинди. Бу ҳақда 2 февралдаги матбуот анжуманида фавқулодда ҳолатлар вазири Бообек Ажикеев билдирди.
Вазир авариянинг келиб чиқиш сабабини ҳозирда махсус комиссия ўрганаётганини таъкидлади. Унинг айтишича, ИЭМдаги авария сабабини бартараф қилиб, ишни тиклаш учун 5-7 кунгача вақт керак бўлади.
«Икки версия кўриб чиқилмоқда [МХДҚнинг етакчиси] Қамчибек Қидиршаевичнинг топшириғи билан махсус амалга оширилган бўлиши мумкин деган тахмин кўриб чиқилмоқда. Сабаби, кечаси учда бир неча марта тарс этган. Шунингдек, техник сабабдан бўлиши мумкинлигини ҳам инкор қилмаймиз», — деди у.
Энергетика вазирлигининг дастлабки маълумотига кўра, портлаш ИЭМнинг иссиқлик агрегатининг 14-ўт қозонида бўлган. Авариядан жабрланган беш киши касалхонада ётибди — уларнинг иккитаси оғир ҳолатда жонлантириш бўлимида экани айтилмоқда.
Энергетика вазирлиги авариянинг оқибатларини бартараф қилиш мақсадида тезкор штаб тузди. Иссиқликни маълум даражада сақлаб туриш учун пойтахтдаги иссиқ сув ҳам ўчирилди. Мактаб ва болалар боғчалари вақтинчалик онлайн ўқитишга ўтказилди.
«Бишкек иссиқлик энерго» ишхонасининг директор ўринбосари Шаршенбек Сарикеев пойтахтнинг тўққизта кичик туманида иссиқлик таъминоти узилишга учраганини билдирди. Улар: №3, 5, 6, 7, 11, 12 кичик туманлар, № 8 кичик туманининг бир қисмида ва «Улан», «Кок-Жар» кичик туманлари.
Президентнинг матбуот котиби Аскат Алакозов авария Садир Жапаровнинг шахсий назоратида эканини ва у унинг оқибатларини қисқа муддатда бартараф қилиш бўйича топшириқ берганини таъкидлади.
Бишкек ИЭМда 2018 йилнинг январь ойи охирида ҳам авария бўлган. Унда шаҳарликнинг уйларида ҳарорат пасайиб, иссиқ сув бериш узилиб қолган. Авариягача ИЭМ 386 миллион доллар насия ҳисобидан модернизация қилинган. Сўнгра бу бўйича жиноий иш қўзғалган.
