Россияга қулликка сотилиб кетган 29 ёшли қирғизистонлик аёл ватанига қайтарилди. Бу ҳақда 14 июнда жабрланувчининг акасига таяниб Kaktus.media нашри ёзди.
Маълумотга кўра, жабрланувчи Россияга бир аёл катта маош тўланувчи ишга жойлаштиришни ваъда қилгани учун борган. Аммо кутиб олганлар қизнинг “паспортини олиб қўйиб, калтаклаб, пулини тўламай мажбурлаб ишлатишган”.
“Қиз Қирғизистондаги укасига телефон қилиб, унинг қочишига боланинг дўстлари ёрдам берган. Ҳеч қандай ҳужжатлари йўқлиги учун қизни юборган бишкеклик аёл уни уни Россиядаги иш берувчилардан 60 минг рубль пулини ўғирлаганликда айблаб, қўрқита бошлаган”, — дейилади маълумотда.
Жабрланувчининг яқинлари ИИВга мурожаат қилган. Қирғизистоннинг Россиядаги элчилиги ва ИИВнинг вакиллиги воқеани текшириб, қизни юртига қайтиб келишига кўмаклашган. Уни акаси 14 июнда “Манас” аэропортида кутиб олди.
Бишкекнинг Октябрь туман милициясидан бу факт рўйхатга олиниб, терговгача текширув ишлари бошланганини маълум қилишди. Ҳозирда жабрланувчи томоннинг аризаси қаралмоқда.
Бунгача “МедиаХаб” Туркияда жинсий қулликка сотилиб кетган аёл ҳақида видео жойлаган. Унда икки боланинг онаси уни шу йил Туркияга “қарияни боқасан, яхши пул топасан” деб ишга чақирган аёл сотиб юборганини айтган. У Туркияда қулликка учраган қирғизистонлик бошқа қизлар ҳам борлигини таъкидлаган.
Жабрланувчи Қирғизистонга қайтиб келгандан кейин милицияга мурожаат қилган. унинг айтишича, милиция ходимлари жабрланувчининг аризасини олмай, “сотилиб кетганингни исботлай олмайсан” деб кулишган.
Аёлнинг адвокати Рахматулло Юсупов бу бўйича милиция ҳеч фандай иш қўзғамаганини таъкидлаб, Қорасув туман прокуратурасига мурожаат қилганини билдирган. Ҳозир улар прокуратуранинг жавобини кутмоқда.
