Қирғизистон ҳудудида одамнинг юзидан танувчи функциясияга эга ташқи видео кузатув камералари ишга туширилди, бу камералар МДҲ давлатларида мамлакатлараро қидирувда бўлган одамларни юзидан таниб, аниқлашга имкон беради. Бу ҳақда ИИВнинг матбуот хизмати билдирди.
Муассасанинг маълумотига кўра, 2-июндан бошлаб мазкур камералар ёрдамида саккиз куннинг ичида МДҲ давлатларида қидирувда бўлган 57 киши топилиб, милицияга етказилган.
ИИВдан олиб келинганларнинг кўпчилиги МДҲ давлатларида турли жиноятларда айбланиб, мамлакатлар аро қидирувга берилган Қирғизистон фуқаролари эканини таъкидлашди. Уларнинг айримлари бундан 8-9 йил олдин қидирувга берилган. Шунингдек, муассасадан Россиянинг ва Ўзбекистоннинг 4 фуқароси қўлга олинганини билдиришди.
«Уларнинг орасида одам ўлдиришга ҳаракат қилиш, экстремистик жиноятлар (МХДҚ ходимларига ўтказиб берилган), бебошлик, ҳужжатларни қалбакилаштириш бўйича қидирувда юрганлар бор», — дейилади муассасанинг маълумотида.
Россиянинг ҳуқуқни муҳофаза қилиш органлари давлатлар аро қидирувда юрган 85 мингдан ортиқ одам ҳақида маълумот берган. Июннинг бошидан бери Қирғизистонда россиялик уч сиёсий фаол қўлга олинган.
6-июнда ҳарбий комиссариатни ёқишда айбланган, урушга қарши чиққан фаол Алексей Рожков Қирғизистонда ушлангани маълум бўлган.
Алексей ўзи МХДҚнинг ходимлари «агар ҳамкорлик қилмасанг, қийнаймиз деб қўрқитишганини» айтган.
9-июнда эса Бишкекда Россиянинг «Левий блок» жамоат ҳаракатининг фаоли Лев Скорякин қўлга олингани маълум бўлган.
Икки кундан кейин — фаол Алёна Крилова қўлга олинган. Россияда иккисига ҳам жиноят иши қўзғалган.
Скорякин билан Крилованинг адвокатини айтишича, унинг мижозлари Қирғизистондан бошпана сўрашган.
Асосий саҳифага иллюстратив сурат қўйилди.
