«Бутун Қирғизистон» фракцияси раҳбари Адахан Мадумаров президент Садир Жапаровнинг Кампиробод масаласи бўйича 4-октябрь куни Ўзганда халқ билан ўтказган учрашувини «спектакль» деб атади. Бу ҳақда у Кампиробод сув омбори бўйича ўтаётган халқ қурултойида маълум қилди.
Мадумаров мамлакат раҳбари иштирокидаги йиғилишда фақат Жапаров тарафдорлари тўпланганини таъкидлаб, «Кампиробод масаласини ўшалар ҳал қилишадими» дея савол берди.
«Қирғизистондаги барча тарафдорларини олиб келиб, зални тўлдириб, “аа” деб оғзини очса, қарс-қур қилиб қарсак чалдирди. Айрим ўзганлик оқсоқоллар “Бизга давлат раҳбарлари биринчи марта келмоқда” деди, номус йўқ. Мана шулар тўпланиб олиб “Кампиробод кетаверсинми?” деб овозга қўяр эмиш», - деди у.
Депутат Кампиробод бўйича Қирғизистон фойдасига ҳал қилинган 1975-йилга тегишли ҳужжат борлигини таъкидлади. Унга кўра, қарорда Ўзбекистон билан сув омбори бўйича бунгача қабул қилинган барча қарорлар бекор қилинган.
«Ҳозиргилар “Турдакун Усубалиев, Акматбек Суюнбаев, Исхак Раззаковлар айбдор экан”, дейишмоқда. Булар улар қилган ишнинг мингдан бирини қила олмайди. “Уларга тил текизма, алоқаси йўқ, улар жавоб бера олмайди”, дедим. Бу юртда бу халқнинг бошида сиздек жоҳил ҳукумати бўлмаган», — деди у.
Шунингдек Мадумаров Кампиробод масаласини маҳаллий қишлоқ депутатлари ҳал этсин деган таклиф қилганини қўшимча қилди.
Бугун, 15-октябрь куни Ўш вилоятининг Ўзган туманида Кампиробод сув омбори бўйича халқ қурултойи бўлиб ўтди. Юзлаб одамлар Кампирободнинг Ўзбекистонга ўтказилишига қарши эканликларини таъкидлаб, «халқ овозига қулоқ солинг» деб расмийларга мурожаат қилди.
Президентнинг халқ билан учрашуви
4 октябрь куни Ўзган тумани ҳокимлигида Кампиробод ҳақида ёпиқ йиғилиш бўлиб ўтди, унда президент Садир Жапаров бошчилигидаги ҳукумат вакиллари ва депутатлар иштирок этган.
Йиғилишга тўпланганларнинг деярли ярмидан кўпи ва журналистлар киритилмади – бу бинонинг торлиги билан изоҳланиб, улар икки босқичда қабул қилиниши айтилган. Шунингдек, йиғилишда қатнашганларнинг бинога кираверишда телефонлари олинган.
Учрашувдан жонли эфир узатган «Клооп» нашри ва «Т-Медиа» телерадиокомпаниясининг видеолари эса журналистларнинг фейсбук саҳифасига ҳужум қилиниб, ўчирилган.
Кампиробод бўйича йиғилишга кирмай қолган аҳоли президент Садир Жапаров ва у билан бирга келган мутасаддилари «ташқарига чиқсин» деб талаб қилишган. Бироқ уларнинг талаби бажарилмаган. Шундан сўнг, ташқарида қолган халқни йиғилишга таклиф қилишган, бироқ баъзи маҳаллий аҳоли вакиллари бинога киришдан бош тортган.
