Қирғизистон Ички ишлар вазирлиги Тожикистоннинг ташқи ишлар вазирининг ўринбосари Содика Имомининг баёнотини инкор қилди.
Қирғизистон ИИВи қўшни давлатнинг ташқи сиёсий маҳкама баёноти «ҳақиқатга тўғри келмайди ва ҳеч қандай фактлар билан тасдиқланмаган» деб жавоб берди.
«Бошқа давлатнинг миллатига ва фуқаролигига қараб ҳеч қандай ноқонуний ҳаракатлар ёки таҳдидлар сўнги вақтларда реал тарзда бўлмаган ва бундай ҳолатлар қайд этилмаган. Республикамизда 80дан ортиқ турли миллат вакиллари истиқомат қилади. Улар учун Қирғизистон ватани бўлиб ҳисобланади», — деб билдиришди ИИВдан.
Масалан, 19-сентябрь куни Имоми 14-17-сентябрь кунлари Қирғизистон-Тожикистон чегарасида бўлиб ўтган қуролли тўқнашув юзасидан ўтказилган брифингда Қирғизистонда тожик миллатига мансуб фуқаролар таъқиб қилинаётганини таъкидлади.
«Бишкекда ва Қирғизистоннинг бошқа йирик шаҳарларида тожик миллатига мансуб фуқаролиги бўлмаган фуқаролар аниқланиб, уларга нисбатан ноқонуний зўравонлик ҳаракатлари қўлланилмоқда: уларни калтаклаб, номаълум томонга олиб кетишмоқда. Қўшнидан душман қиёфасини яратиш бўйича агрессив кампания шундай нарсаларга олиб келади», — деди Имомий брифингда.
Бундан ташқари, Қирғизистон ИИВ республика ҳудудида яшовчи фуқароларнинг ҳуқуқ ва эркинликлари Конституция ва мамлакат қонунлари билан ҳимоя қилинишини, унга кўра ҳеч ким ижтимоий, касбий ва мулкий ҳолати, жинси, ирқи, миллати, тили, дини ёки бошқа ҳолатларига кўра камситилмаслигини қўшимча қилишди.
Қуролли жанжал
Қирғизистон-Тожикистон чегарасида 14-сентябрда бошланган қуролли тўқнашув 16-сентябрда авж олган. Қирғизистон Чегара хизмати 18-сентябрь кечга яқин чегарадаги вазият барқарорлашиши ҳақида хабар берди. 20 сентябрь куни маҳкама чегарадаги вазият нисбатан барқарор эканини айтган. Қирғизистон-Тожикистон чегарасидаги қуролли тўқнашувда камида 59 нафар Қирғизистон фуқароси ҳалок бўлган, 185 дан ортиқ киши жароҳатланган.
Тожикистон ТИВнинг дастлабки маълумотларига кўра, қуролли тўқнашувда 41 нафар Тожикистон фуқароси ҳалок бўлган, 20 дан ортиқ киши жароҳатланган.
Қирғизистон расмийлари воқеани тажовуз ва тожик томони уюштирган ҳарбий ҳужум деб атади. Тожикистон томони ҳам воқеани агрессия деб атайди ва Қирғизистонни можарони кескинлаштиришда айблайди.
