ТИВ Тожикистон вазирининг можаролар ҳақидаги баёнотини «провокация» сифатида тафсифлади

159
Тожикистон ТИВ ўринбосари Содиқ Имоми 19-сентябрдаги брифингда.

Қирғизистон Ташқи ишлар вазирлиги Тожикистон ТИВ томонидан 19-сентябрь куни ўтказилган брифинг юзасидан баёнот берди. Вазирлик Тожикистон ташқи ишлар вазири ўринбосари Содиқ Имомининг сўзларини «провокацион» деб атади.

«Бундай юқори мартабали дипломатнинг хорижий давлатнинг ички сиёсати ҳақидаги нопрофессионал ва ўйламасдан фикр юритиши, жумладан, ҳар қандай сегрегация сиёсатини амалга оширишга ўринсиз ҳавола қилиши ҳақиқат ва дипломатик этиканинг асосий меъёрларига тўғри келмайди. Ҳақиқатга тўғри келмайдиган, бузиб кўрсатилган ва ёлғон маълумотлар йиғиндиси бўлган очиқ-ойдин провокацион хабарлар тасдиқлашни талаб қилмайдиган шартнома сифатида тақдим этилмоқда», — деди Қирғизистон ТИВдан.

Бундан ташқари, ТИВ «қирғиз-тожик давлат чегарасини делимитация қилиш бўйича музокараларнинг давом этиши Қирғизистоннинг мустақил ҳудудини қуролли куч билан босиб олиш учун асос бўлмаслиги керак»лигини таъкидлади.

«Тожикистон томонининг жаҳон ҳамжамиятини чалғитиш бўйича барча бемаъни ва қўпол уринишларига қарамай, Тожикистон Республикасининг халқаро ҳуқуқнинг асосий тамойиллари ва нормаларини бузган ҳолда Қирғизистон Республикасига қарши ғайриинсоний қуролли тажовуз фактлигича қолмоқда», — дейилади вазирликдан.

Тожикистон ташқи ишлар вазири ўринбосари Содиқ Имоми 19 сентябрь куни брифинг ўтказди. Унда у чегарадаги қуролли можарода Қирғизистонни айблаган. Шунингдек, у чегарада 41 нафар Тожикистон фуқароси ҳалок бўлганини маълум қилди – бироқ уларнинг қанчаси тинч аҳоли ва қанчаси ҳарбий хизматчилар эканини аниқламади.

У зарар кўрган уйлар ҳақида ҳам юзаки маълумотлар бериб, уларнинг аниқ сони ва қайси қишлоқларда эканлигини маълум қилмаган.

Бундан ташқари, Имоми «Қирғизистонда тожик фуқаролари калтакланиб, зўравонликка дучор қилинмоқда» деганди. Шу билан бирга, у ҳеч қандай далил келтира олмади.

Кейинроқ Қирғизистон ИИВи Имомининг «тожик фуқаролари зўравонликка дучор бўлмоқда» деган баёнотини рад этди.

Қуролли можаро

Қуролли тўқнашувлар пайтида уйларини ташлаб кетишга мажбур бўлган боткенликлар. Сурат: Бекболсун Кайипов/ Kloop

Қирғизистон-Тожикистон чегарасида отишма 14-сентябрь куни бошланган. 16 сентябрда эса вазият ёмонлашди. Қирғизистон ҳукумати Тожикистон томонини босқинчилик ва ҳарбий ҳужумда айблади. Тожикистон томони эса вазият кескинлашувида Қирғизистонни айбламоқда.

Соғлиқни сақлаш вазирлиги маълумотларига кўра, 19-сентябрь ҳолатига кўра, можародан жабрланган Қирғизистон фуқаролари сони 198 нафарни ташкил қилган. Шунингдек, қуролли тўқнашувда 59 нафар Қирғизистон фуқароси ҳалок бўлган.

Дастлабки маълумотларга кўра, Қирғизистонга етказилган моддий зарар миқдори тахминан 1,5 миллиард сомни ташкил қилган.