Собиқ президент Алмазбек Атамбаев Чуй вилоятининг Молдовановка қишлоғидаги №27 колонияга ўтказилди. Бу ҳақда жазони ижро этиш хизматидан билдиришди.
Бунгача Атамбаев Бишкекдаги №47 колонияда сақланган, ЖИК бу колонияни бузишга қарор қилган.
30-мартда Жогорку Кенеш депутати, собиқ президентнинг ўғли Сеидбек Атамбаев отаси бошқа қамоққа ўтказилиши мумкинлигини билдирган. Халқ вакили отасининг ҳаётига хавф борлигини ҳам қўшимча қилди.
«Унинг [Атамбаевнинг] ҳаётига хавф бор. Ҳеч қачон Алмазбек Шаршенович ўз жонига қасд қилмайди. Агар бошини ёриб олса ёки овқатга тиқилиб ўлиб қолса, мен тўғридан-тўғри шу ҳукумат Атамбаевга қўл кўтарди деб ҳисоблайман», — деб билдирган халқ вакили.
Депутат ҳамкасбларини собиқ президентни судга куч билан олиб келинишини кўриб чиқувчи комиссия тузишни ҳам таклиф қилган.
Атамбаевнинг куч билан судга олиб келиниши
23-мартда Биринчи май туман судида Қўйтош воқеаси бўйича навбатдаги суд мажлиси бўлган. У ерга машинадан тушиб, судга киришга қаршилик қилган собиқ президент Алмазбек Атамбаевни мажбурлаб олиб киришган. Натижада Атамбаевнинг аҳволи ёмонлашиб кетгани учун яна колонияга олиб кетилиб, суд мажлиси 30-мартга жилган.
Атамбаевнинг адвокати Замир Жоошев Атамбаев ўзини ёмон ҳис қилаётгани сабаб суд мажлисига қатнашишдан бош тортиб ариза ёзишига қарамай уни мажбурлаб олиб келишганини билдирган. Унинг айтишича, қўриқчилар «Алмазбек Атамбаевни хонасидан колониянинг қорли ҳовлисига ич кийимда, оёқ-қўлидан ушлаб судраб чиқиб», куч билан автозакка солишган.
Қийноқларнинг олдини олиш миллий марказининг ходимлари 24-мартда собиқ президент Алмазбек Атамбаев билан учрашиб, унинг қўли ва оёқларида кўкарган доғларни кўришган.
«Атамбаев кўкарган доғларни тиббий кўрикдан ўтказишдан бош тортди», — деб билдиришган марказдан.
Қийноқларнинг олдини олиш миллий марказининг ходимлари колония раҳбарларидан собиқ президентнинг камерасининг тўғрисида жойлашган кузатув камеранинг видеосини ҳам беришни сўрашган. Бироқ колониядан серверга кира олишмаслигини айтиб, видеони беришдан бош тортган.
Кейинчалик ЖИҚ ўз ходимлари собиқ президентга ҳеч қандай куч ишлатилмаганини ёки руҳий босим бўлмаганини, у суд мажлисига қатнашмаслик учун жанжал чиқарган деб билдирган.
Шунингдек, ЖИҚ 23-мартда Алмазбек Атамбаев тиббий ёрдам сўраб мурожаат қилмаганини ҳам айтган.
«Атамбаевнинг аҳволи ёмонлашмоқда»
Собиқ президент Алмазбек Атамбаевни 14-апрелда яна Бишкекнинг Биринчи май туман судидаги мажлисдан тез ёрдам машинаси олиб кетган. Бу собиқ президентни суд залидан тез ёрдам билан олиб кетилган иккинчи ҳолат.
Қийноқларни олдини олиш миллий марказидан собиқ президентнинг соғлиғи куч ишлатиб судга олиб келинаётгани учун ёмонлашаётганини билдиришган.
Собиқ президент ҳуқуқ ҳимоячиларига ўтиришга ҳам, туришга ҳам имкон бермаётган бел оғриғини айтиб шикоят қилган. Шунингдек, биро ҳаракат қилса, нафас етмай, қўл-оёғини сезмай қолаётганини айтган.
