«Иссиқкўл» меҳмонхонаси ўрнига қуриладиган президент администрациясини «ТС ГРУПП» компанияси қуради. Бу ҳақда «Азаттык»қа президентнинг иш бошқарувчиси Тилек Батирканов билдирди.
Унинг айтишича, қурилиш компаниясини лойиҳанинг сармоядорлари танлаган, президент администрацияга қарашли Қурилиш, ижтимоий-иқтисодий ва маъмурий объектларни реконструкциялаш бўйича давлат дирекцияси уларнинг буюртмачиси бўлди.
«ТС ГРУПП» компаниясининг раҳбари Алмаз Тиленов ҳам компанияси президент девонини қуришга жалб қилинганини тасдиқлади. Унинг айтишича, шартномага қозоғистонлик инвесторлар билан қўл қўйилган.
Бу орада Батирканов президент маъмуриятини бир йилда қуриб, фойдаланишга топшириш режалаштирилаётганини таъкидлади.
Президент маъмурияти билдиришича, лойиҳани амалга оширишга кетадиган маблағнинг миқдори ҳозирча номаълум, бу қурилиш давомида маълум бўлади.
«16 гектар ерга инвесторлар бизнес марказларни, турар-жой, мактаб, бола боғчаларини қуради. Улар бизнес режа тайёрлаб, қурилиш ишларини шунга қараб олиб боришади. Биз ҳозир инвесторларни турли томондан, дунёнинг тўрт бурчидан жаолб қиляпмиз. “Ишлаймиз, инвестиция киритамиз” деганларни, Қирғизистоннинг ривожланиши учун маблағ киритадиган сармоядорларни чақиряпмиз», — деди у. Шунингдек, у президент девонининг олдига яна бир бино қурилишини, бу ерга барча вазирликлар жойлаштирилишини қўшимча қилди.
«ТС ГРУПП» компаниясининг сайтида компания 2014-йили тузилгани айтилади. Адлия вазирлигининг маълумотига кўра, «ТС Групп Компани» МЧЖнинг асосчиси Акилбек Сарманов ҳисобланади.
Давлат раҳбари Садир Жапаров 15-апрелда «Иссиқкўл» меҳмонхонаси ўрнига қуриладиган президент девонининг янги биносини қурилишига капсула солган. Кейин у қурилишга «давлатнинг ьир тийин пули кетмаган» деб ишонтирган.
«Бизнинг жамиятга яхши иш қилсанг ҳам, ёмон иш қилсанг ҳам ёқмайсан. Шунинг учун олдингилар ҳеч нарса қилмай маза қилиб ўтирайин деб безор бўлган кўринади?» — деб айтилган президентнинг билдирувида.
Президентнинг матбуот котиби Эрбол Султанбаев президент девонини қурилиши — Қирғизистоннинг обрўси эканини ёзган. Султанбаев энди янги ва замонавий бинода хорижлик делегацияларни «уят бўлмай» қабул қилса бўлади деб ҳисоблайди.
«Чет давлатлирга борганда уларнинг административ комплексларига, архитектурасига доим ҳавас билан қараймиз. Худо хоҳласа, энди ўлкамизнинг меҳмонлари ҳам бизга шундай ҳавас билан қарашсин», — деб ёзган у Фейсбук саҳифасида.
Бироқ депутат Дастан Бекешев «16 гектар ер — тийин эмас, жуда қиммат туришини» айтиб, президентнинг сўзларига қўшилмаслигини билдирган.
«16 гектар ер — тийин эмас, жуда қиммат туради. Ер ҳам халқнинг мулки ва давлатдан бир тийин ҳам кетмайди деб айтиб бўлмайди. Бишкекда 1 сотих ер 50 минг доллар туриши мумкин», — деб Телеграм каналида ёзди Бекешев.
