Собиқ соғлиқни сақлаш вазири Космосбек Чолпонбаевни юрагини операция қилиш керак. Бу ҳақда Миллий кардиология ва терапия марказининг директори Акпай Сарибаев Kaktus.media нашрига билдирди.
Унинг айтишича, Чолпонбаев юракнинг қон томирларини текшириш — коронароангиографиядан ўтди. Натижада врачлар стент ўрнатиш зарурлигини аниқлашди.
Стент — ингичка томирларни кенгайтирувчи махсус каркас.
Космосбек Чолпонбаев 22 октябрда №1 тергов қамоғидан миокарда инфаркти билан касалхонага етказилган. Унда собиқ вазирда қон оқиш хавфи юқори бўлгани сабаб қон томирлари текширилмаган.
Миллий кардиология ва терапия марказининг директори Чолпонбаев оғир аҳволда эканини билдирди.
«Уни операция қилиш керак. Бу бепул эмас. Агар у бугун-эрта моддий масалани ҳал қилмаса, унда уни яна тергов қамоғига юборамиз», — деди Сарибаев.
Унинг айтишича, Чолпонбаев моддий масалани сешанба куни ҳал қилишини билдирган.
Космосбек Чолпонбаевнинг иши
Космосбек Чолпонбаев 2018 йилдан 2020 йилгача соғлиқни сақлаш вазири бўлиб ишлаган. У олдин Қирғизистоннинг Фармацевтика иттифоқининг раиси бўлган.
Хавфсизлик кенгашининг ўлкадаги коронавирус пандемиясига талабдагидай тайёргарлик кўрилмагани бўйича айбловларидан кейин собиқ президент Сооронбай Жээнбеков уни вазирлик хизматидан 1 апрелда олган. 15 сентябрда молия полицияси уни пандемия вақтида лавозимни суиистеъмол қилиш ва эътиборсизликда гумон қилиб қўлга олган.
17 сентябрда Бишкекнинг Биринчи май туман суди собиқ вазирни тергов изоляторига икки ойга — 15 ноябргача киритиш қарорини чиқарган. Суд мажлисидан кейин Чолпонбаев журналистларнинг саволларига жавоб бераётиб, ўзини айбдор эмаслигини айтган.
