2022 йил баҳорида Баткен вилоят ИВСида маҳкум томонидан зўрлангани ҳақида блогер Батмакан Жолдубаева 25 декабрь куни жонли эфирда маълум қилди.
Унинг айтишича, ҳибсга олинган илк кунлариданоқ ИВС ходимлари унга босим ўтказган: яқинлари юборган озиқ-овқат ва буюмларини етказиб бермаган, соатини олиб қўйишган, ўзи эса сув ва канализация тизими ишламайдиган камерага қамалган.
Жолдубаева милициянинг ноқонуний ҳаракатларига эътироз билдирганида, ИВС раҳбари унга: «Нима қиляпсан? Сенга мавжуд моддалар камми? Сен менинг қўлимдасан», — деб таҳдид қилган.
Бир неча кун ўтиб, блогерга ювиниш куни душга бориш таклиф қилинган. Унга ҳафтада бир марта ювиниш имкони берилгани учун ҳеч нарсадан шубҳаланмай, рози бўлган.
«Мен душга кирганимдан 15 минут ўтиб, Баткен вилояти ИИБ раҳбари ўринбосарини ўлдирган Нурбек Сидиков кириб келиб, мени зўрлади. Унинг қўлида ўткир нарса борлигини кўрдим. У мени ўлдиришидан қўрқиб, унинг қилмишларига чидашга мажбур бўлдим», — деди у.
Бундан икки ҳафта ўтиб, Жолдубаевани гўёки терговчи ҳузурига чақиришган. Аммо уни бошқа бир маҳкум кутиб турган посбонлар хонасига олиб боришган.У эса қочиб камерага қайтган.
«Қайтиб келиб […] қўшни камерадан устара сўрадим, бир марталик устара беришди. Ўзимни кесдим ва [ИВСдан] чиқдим», — деб ҳикоя қилади у.
Блогер ушбу воқеалардан кейин Бош прокуратура, ИИВ ва ГКНБ раҳбари Камчибек Ташиевга мурожаат қилганини таъкидлади. Аммо унинг айтишича, ҳеч қандай жавоб олмаган ва ИВС ходимлари, аксинча, «кўпроқ юлдузларга эга бўлган».
Баткен тумани ИИБ Жолдубаева билдирган шикоят асосида ички текширув бошланганини маълум қилди.
Шунингдек, 2022 йил март ойида Жолдубаева ИВСда ўзини кесганидан сўнг, Баткен вилояти ИИБ ишчи гуруҳи воқеа жойини текширганини эслатишди. Улар блогерга нисбатан қонунбузарликлар аниқланмаганини билдирган.
2022 йил март ойида Жолдубаева журналист Арзигул Галимбетова иши доирасида ҳибсга олинган. Галимбетова 26 март куни вафот этган ва ўлимидан аввал блогерни уни ўлдириш мақсадида сеҳр-жоду қилганликда айблаган.
ИИБ маълумотларига кўра, ўшанда Жолдубаева эҳтиётсизлик орқали ўлимга сабаб бўлганликда айбланган. Кейин экспертиза Галимбетова астма сабаб юз берган юрак етишмовчилигидан вафот этганини кўрсатган.
2022 йил август ойида Баткен туман суди Жолдубаевани уй қамоғига олиб, 2023 йил январь ойида журналистнинг синглиси унга бўлган даъволардан воз кечган. Бир ойдан кейин эса суд Жолдубаевани «эҳтиётсизлик орқали ўлимга сабаб бўлганлик» моддаси бўйича оқлаган.
