Қирғизистон адвокатлари жамоаси адвокат Самат Матцаковнинг қамоққа олиниши муносабати билан матбуот анжумани ўтказди.
Юристларнинг таъкидлашича, адвокатларни ўз хизмат фаолияти учун таъқиб қилиш «фақатгина бир шахсга ҳужум эмас, балки Қирғизистон Республикаси фуқароларининг адолатга бўлган ҳуқуқларига ва бутун адолат тизимига таҳдиддир».
Улар Матцаковнинг уйи ва ишхонаси суд қарорисиз тинтув қилинганини ва тергов ишга алоқадор бўлмаган ҳужжатларни олиб қўйганини маълум қилишди.
Адвокатларнинг сўзларига кўра, Матцаковга босим ўтказилмоқда, жумладан, у кўрсатма беришдан бош тортганидан кейин ноқонуний сўроқлар ўтказилган. Шунингдек, суд жараёнида кўплаб қонунбузарликлар содир этилганини таъкидлашди.
Адвокатлар буни «сиёсий сабабли таъқиб» деб аташди ва тергов ҳамда суд ҳаракатларининг халқаро нормаларда белгиланган адвокат ҳуқуқларини ҳимоя қилиш тамойилларига зидлигини айтди.
«Матцаков резонанс уйғотган жиноят ишларини ҳимоя қилади ва ўз фикрини очиқ ифода этади. Бу унинг иши касбий фаолияти билан боғлиқ бўлиши мумкинлиги ҳақида хавотир уйғотади», — деб ҳисоблайди юристлар.
Адвокатлар Матцаковни қамоқдан озод қилишни ва уни озодликдан маҳрум этиш билан боғлиқ бўлмаган эҳтиёт чорасини қўллашни талаб қилишди. Шунингдек, адвокат ҳуқуқларини қўпол равишда бузгани учун тергов идоралари ва судьянинг ҳаракатларини текширишни сўрашди.
Матцаков — KG Group қурилиш компанияси раҳбари Имомиддин Тошовнинг адвокати. Тошов аввалроқ СИЗОда қийноқларга дуч келгани ҳақида маълум қилган. Матцаков шунингдек журналист Актилек Қапаров ва акын Аскат Жетигенни ҳам ҳимоя қилади.
29 ноябрь куни Давлат миллий хавфсизлик қўмитаси (ГКНБ) ходимлари Матцаковнинг уйини тинтув қилиб, уни қўлга олишган. Унга нисбатан катта миқдорда фирибгарлик ва ҳужжатларни қалбакилаштириш бўйича жиноий иш қўзғатилган. Аммо Матцаков ишни ўзининг касбий фаолияти билан боғлаб, «буюртма иш» деб атамоқда.
Адвокатга нисбатан эҳтиёт чорасини белгилаш суди бутун тун давом этган ва 30 ноябрь куни эрталаб уни 30 декабргача қамоққа олиш ҳақида қарор қабул қилинган.
