Жогорку Кенгаш раиси Нурланбек Шакиев Қирғизистоннинг янги давлат мадҳияси ёзилишини маълум қилди. Бу ҳақда у Қора-Қирғиз автономияли вилоятининг 100 йиллигига бағишланган парламент тадбирида айтиб ўтди.
«Биз мадҳияни ўзгартирмоқчимиз. [Ҳозирги] мадҳия СССР таркибидан чиққан пайтда қабул қилинган эди. Ҳозирда биз мустақил, ривожланиш йўлига кирган мамлакатмиз. Шунинг учун мадҳияни ўзгартиришимиз керак. У шундай бўлиши керакки, ҳар бир қирғизистонлик уни бемалол ижро эта олсин», — деди Шакиев.
Қирғизистон давлат мадҳияси 1992 йил 18 декабрда Қирғизистон Республикаси Олий Кенгаши қарори билан тасдиқланган. У дастлаб уч банд ва куйдан иборат бўлган. Бироқ, 2012 йил 27 декабрдаги Жогорку Кенгаш қарорига кўра, унинг иккинчи банди чиқариб ташланган.
