Жогорку Кенгаш депутати Султанбай Айжигитов 14 октябрда парламентнинг тегишли қўмитаси мажлисида Экономика вазирлиги томонидан келтирилган мамлакат иқтисодий ўсиши ҳақидаги маълумотларга ишонмаганини билдирди.
Унинг айтишича, Қирғизистон бир йилда иқтисодиётда бутун 32% ўсишга эриша олмайди.
«Сиз бу даражада кўп иш қила олмайсиз, чунки ривожланиш суръатингиз ундай эмас. Охирги уч йилни ҳисоблаб, реалистик баҳоласак, иқтисодий ўсиш атиги 5-6% ни ташкил этади», — деди депутат.
Айжигитов Экономика вазирлигида текширув ўтказишни талаб қилди. У барча рақамларнинг ишончлилигини текшириш зарурлигини таъкидлади. Депутатнинг фикрича, агар бу амалга оширилмаса, мамлакат раҳбарияти хато қарорлар қабул қилиши мумкин, чунки улар иқтисодий ўсишнинг юқори кўрсаткичларига ишонишади.
«Масалани синчковлик билан тушуниш керак. Сиз [Экономика вазирлиги] жамоатчиликни адаштиришингиз мумкин. Ҳатто президентнинг ҳам бошини айлантиришингиз мумкин. Агар сиз нотўғри маълумот берсангиз, барча давлат қарорлари хато бўлиши мумкин», — деди депутат.
Июль ойининг ўртасида Ҳукумат раҳбари Ақилбек Жапаров Қирғизистоннинг бугунги иқтисодий ҳолатини «яхши баҳолаш» мумкинлигини билдирган эди. Унинг сўзларига кўра, 2023 йилда Қирғизистоннинг ЯИМ ўсиши ўртача 7% ни ташкил этган бўлса, шу йилнинг биринчи ярмида иқтисодиёт 8,1% га ўсган ва ЯИМ ҳажми 559 миллиард сўмдан ошган. Шунга қарамай, Жапаров Қирғизистон иқтисодиётида «йўлбарс сакраши»ни амалга ошириш кераклигини айтган.
