Жогорку Кенеш депутатлари Конституциявий қонунга «Қирғизистон Республикаси Вазирлар Маҳкамаси тўғрисида»ги ўзгартиришлар киритиш бўйича қонун лойиҳасини учинчи ўқишда қабул қилди. Қонун лойиҳаси Вазирлар Маҳкамасини парламент қарорларини бажаришга мажбур қилади. Ҳужжат имзолаш учун президентга юборилди.
Қонун лойиҳаси ташаббускори — депутат Дастан Жумабеков. Ҳужжатда таъкидланишича, бу ўзгартиришлар Вазирлар Маҳкамаси тўғрисидаги қонундаги «коллизияларни бартараф этиш» учун зарур.
«Жогорку Кенеш қарорларини бажариш ижро этувчи ҳокимият томонидан вазирликлар ва идоралар даражасида таъминланади, лекин Вазирлар Маҳкамаси эмас. Чунки мазкур Конституциявий қонуннинг 13-моддасида Вазирлар Маҳкамаси ваколатлари доирасида Жогорку Кенеш қарорларини бажариш меъёри йўқ. Бу ҳолатни ҳуқуқий коллизия, яъни қонунлардаги бўшлиқ деб ҳисоблайман», — деди Жумабеков.
Ҳужжатга кўра, Вазирлар Маҳкамаси парламент топшириқларини бажариши шарт бўлади. Депутатлар шунингдек, Вазирлар Маҳкамасига уларнинг топшириқларини кўриб чиқиш муддатини максимал 15 кун қилиб белгиламоқчи.
Бу муддат мобайнида Вазирлар Маҳкамаси қонун лойиҳасини йўллаган депутатга расмий хулоса тақдим этиши шарт.
Аввалроқ, мазкур қонун лойиҳаси муҳокамасида Жумабеков Вазирлар Маҳкамаси раҳбари ўринбосари Эдил Байсаловнинг сўзларини эслатган эди. Байсалов ўтган йили Жогорку Кенеш қарорлари тавсиявий характерга эга эканлиги ва парламент Вазирлар Маҳкамаси ишларига аралаша олмаслигини айтганди. Депутатлар амалдорнинг сўзларидан норози бўлишган ва унинг истеъфосини талаб қилишган. Кейинчалик Байсалов парламент аъзоларидан ўз манзилига йўлланган танқид учун узр сўраган.
