Бишкекнинг Ленин туман судида Temirov Live ва «Айт, Айт деса» лойиҳаларининг собиқ ва амалдаги журналистлари иши бўйича суд жараён бўлиб ўтди.
Ишнинг тўққиз нафар иштирокчиси суд мажлисида сўнгги сўз билан чиқиш қилди. Улар барчаси адолатли қарор чиқарилишини кутаётганликларини маълум қилишди. Журналистлар Сапар Акунбеков ва Тинистан Асипбеков чиқишга улгурмаганликлари сабабли жараён 10 октябрга кўчирилди ва шу куни ҳукм эълон қилинади.
Ҳуқуқ ҳимоячиси Азиза Абдирасулованинг айтишича, Temirov Live лойиҳаси раҳбари Махабат Тажибек қизи ўз сўнгги сўзида журналистлар ҳибсда бўлган пайтда ҳам ишлаганини таъкидлади.
«Махабат [Тажибек қизи] шундай деди: "Биз шунчаки ўтирганимиз йўқ, у ерда ишладик: ҳуқуқлари бузилган бошқаларга маслаҳат бердик. Уларнинг ўз ҳуқуқларини ҳимоя қилишга ёрдам бердик." Шундай қилиб, журналистлар ва фаоллар ҳатто қамоқда ҳам ўз ишларига эга», — деди Абдирасулова.
Бундан олдин, давлат айбловчиси ҳар бир иштирокчига олти йиллик қамоқ жазосини талаб қилган эди.
Temirov Live журналистлари ишида 13 иштирокчи бор. Лойиҳанинг 11 нафар амалдаги ва собиқ ходимлари 16 январь куни оммавий тартибсизликларга чақиришда айбланиб ҳибсга олинган. Махабат Тажибек қизи ва журналист Актилек Капаровни тартибсизликларга чақиришни «ташкил қилишда», қолган журналистларни, жумладан, терговчи Болот Темиров ва журналист Улан Нурманбетовни эса бу чақириқларга «шерикликликда» айблашган. Ишнинг барча иштирокчилари тақдим этилган айбловлар билан рози эмас.
