Депутат Чингиз Айдарбеков соғлиғи сабабли деярли бир ой давомида мамлакатда бўлмаган. Бу ҳақда депутатнинг ўзи АКИpress ахборот агентлигига маълум қилди.
«Тахминан 23-24 кун бўлмаганман. Соғлигим сабабли чет элга кетишим керак эди. Бу ерда маҳаллий мутахассислар билан маслаҳатлашдим, таҳлиллар ўтказдим, аммо ҳеч ким аниқ ташхис қўйиб, даволаниш курсини белгилай олмади. Шифокорлар чет элга ҳужжат топширишни маслаҳат беришди, мен ҳам ариза топширдим», - дейди у.
Депутатнинг айтишича, у танишининг отасининг дафн маросимига ҳамкасби Эмил Жамғирчиев билан бирга борган. Бироқ Жағирчиев чегарада муаммоларга дуч келиб, Айдарбеков ўзи йўлда давом этган.
«Дафн маросими шанба куни бўлиб ўтди. Кейин қон босимим яна кўтарилиб, маҳаллий шифохонага боришга мажбур бўлдим. Ўша куни мени касалхонага ётқизишди, даволашди, кейин эса режа бўйича давом этдим», — деди халқ вакили.
Кампиробод сув омборини Ўзбекистонга бериш бўйича келишувга қарши овоз берган 18 депутат орасида Эмил Жамғирчиев ва Чингиз Айдарбеков ҳам бор эди.
Депутат Элвира Сурабалдиеванинг 27 ноябрь куни хабар беришича, Жамғирчиев Қирғизистон-Қозоғистон чегарасини кесиб ўтмоқчи бўлганида Миллий хавфсизлик давлат қўмитаси томонидан қўлга олинган. Унинг айтишича, у билан бирга Жанар Акаев бошчилигидаги «Альянс» фракциясининг яна бир депутати Чингиз Айдарбеков ҳам ғойиб бўлган.
Кейинчалик маълум бўлишича, Айдарбеков хорижда бўлиб, режали тиббий кўрикдан ўтмоқда.
Шунингдек, қўлга олинганидан сўнг Жамғирчиев Бишкекка олиб кетилгани ва қўйиб юборилгани хабар қилинган. 28 ноябрь куни Жанар Акаев «Жамгирчиевга нисбатан жиноий иш қўзғатишга уринишлар қилинаётганини» маълум қилди ва буни «У Кампиробод сув омбори бўйича келишувга қарши овоз бергани» билан боғлаган.
Миллий хавфсизлик давлат қўмитаси Акаевнинг баёнотини текшириб кўришларини ва Жамғирчиевнинг қаерда эканлиги ҳақида маълумотга эга эмаслигини билдирган.
Жамғирчиевнинг ёрдамчиси эса «Клооп» билан суҳбатда депутатнинг яқинларининг сўзларига кўра, у Жумғолда экани — унинг соғлиғида муаммолар борлигини айтган.
6 декабрь куни Бош прокуратура депутат Жамғирчиевга нисбатан ўта йирик миқдорда пора ундириш иши бўйича чиқарилган оқлов ҳукмини бекор қилишни сўрагани маълум бўлган.
13 декабрь куни депутат Суюнбек Омурзақов отасининг соғлиғи билан боғлиқ муаммолар туфайли йил охиригача таътил сўраган ҳамкасби Жамғирчиевдан хабар олганини айтган. Ҳозир Миллий хавфсизлик давлат қўмитаси депутатни қидирмоқда.
