25 декабрь куни парламент мажлисида депутатлар «коррупцияга қарши кураш» соҳасидаги айрим қонун ҳужжатларига ўзгартишлар киритиш ҳақидаги қонун лойиҳасини иккинчи ва учинчи ўқишда бир овоздан қабул қилдилар.
Мажлис давомида депутат Элвира Сурабалдиева Миллий хавфсизлик давлат қўмитаси вакилларидан давлат амалдорлари ва уларнинг оила аъзолари чет эл фуқаролигига ёки бошқа давлатда яшаш учун рухсатномага эга бўлиши мумкинми, деб сўради.
Жавобда, бу чеклов фақат давлат хизматчисига тааллуқли экани айтилди. Сурабалдиева бу чекловни унинг оила аъзоларига ҳам жорий қилиш кераклигини таъкидлади.
У махсус хизматларни ҳукумат аъзолари ва уларнинг оиласини текшириб, бундай ҳужжатларга эгалиги бўйича суриштирув ўтказишга чақирди:
«Умид қиламанки, МХДҚ шундан кейин мамлакатимиздан потенциал равишда пуллар қайси йўналишда чиқиб кетишини тергов қилади. Сизлар анча олдин бундай текширувни ўтказишингиз керак эди. Кўплаб шахсларни жавобгарликка тортиш зарур, деб ўйлайман», — деди у.
Ҳужжат ишлаб чиқувчиси бўлган МХДҚ коррупция моддалари бўйича жарималарни тўлиқ бекор қилишни таклиф этди. Агар айбдор айбини тан олса ва етказилган моддий зарарни қопласа, унга «озодликдан маҳрум қилишнинг минимал муддатининг ярмидан кам бўлмаган» жазо тайинланиши белгиланган.
Шунингдек, МХДҚ айбдорларга давлат ва маҳаллий бошқарув лавозимларида ишлашни «мажбурий ва умрбод» тақиқлашни таклиф этди. Улар шартнома асосида ҳарбий хизматга ҳам қабул қилинмайди.
Бу тақиқ оғир ёки ўта оғир жиноят содир этилган ҳолларда, айбдорларнинг яқин қариндошларига ҳам татбиқ этилади. Бундан ташқари, улар суд ижрочиси ёки ҳуқуқни муҳофаза қилиш органларига ишга кириш имкониятидан маҳрум бўлади.
Илгари махсус хизмат раҳбари Камчибек Ташиев коррупционерларга «31 декабргача ўз жиноятларини содир этиш ва улар учун жарима тўлаш орқали қутулиш имконияти борлигини» айтган эди. Янги йилдан сўнг эса улар қамоққа олинишини таъкидлаган.
