Халқаро инсон ҳуқуқлари ташкилоти Human Rights Watch Қирғизистон ҳукуматига сиёсий йўналишни ўзгартириб, инсон ҳуқуқлари ва эркинликларини ҳимоя қилишни бошлашга чақирди.
Ташкилотнинг маълум қилишича, 10 декабрда нишонланган Халқаро инсон ҳуқуқлари куни муносабати билан Қирғизистонда байрам қилиш учун деярли асос йўқ эди.
Ҳуқуқ ҳимоячилари ҳукуматнинг «Социал-демократлар» деб номланган охирги мухолифат партияларидан бирининг уч аъзосини сайловлардан олдин қўлга олганини таъкидлади.
«Президент Садир Жапаров маъмурияти ўзгача фикрларни тизимли равишда бостирмоқда [...] Бу маъмурият мухолифат партияларини нейтраллаштиришга ҳаракат қилган биринчи ҳолат эмас», — деб ҳисоблайди ташкилот.
Шунингдек, ҳуқуқ ҳимоячилари ОАВ ва фуқаролик жамиятига нисбатан мисли кўрилмаган ҳужумларни эслатиб ўтди. Улар «хорижий агентлар» тўғрисидаги қонун қабул қилиниши, Олий суднинг Kloop Media’ни тугатиш тўғрисидаги қарори ва тўрт журналистга нисбатан чиқарилган ҳукмларни мисол сифатида келтирди.
Human Rights Watch қайд этишича, сиёсий курс ўзгариши «байрам қилишга арзийдиган воқеа бўлар эди».
13 ноябр куни ҳуқуқни муҳофаза қилувчи органлар Бишкекдаги «Социал-демократлар» штаб-квартирасида тинтув ўтказди. Шундан сўнг, милиция Ирина Карамушкина ва Данияр Чўлпонбоев ўртасидаги гўё сайловчиларнинг овозларини сотиб олиш ҳақидаги телефон суҳбатининг аудиоёзувини тарқатди. ИИВ маълумотига кўра, тергов давомида улар сайловчиларнинг овозларини ҳар бирига 1000 сомдан ташкил этган ҳолда сотиб олишни ташкил қилгани аниқланган.
15 ноябр куни суд «Социал-демократлар» партияси раҳбари Темирлан Султонбеков ва унинг партиядошлари Ирина Карамушкина ҳамда Роза Турксеверни икки ойга қамоққа олиш тўғрисида қарор чиқарди. Улар учаласи ҳам сайловчиларнинг овозларини сотиб олиш иши бўйича айбланмоқда.
17 ноябр куни маҳаллий кенгаш депутатлигига сайловлар бўлиб ўтди. Овоз беришдан олдин «Социал-демократлар»ни жиноий иш очилиши сабабли Бишкек шаҳар кенгаши сайловларида иштирок этишдан четлатишган.
