Қишлоқ хўжалиги вазирлиги томонидан Иссиқкўлнинг Қоракўл шаҳри, Жалолобод вилоятининг Сузоқ ва Ўшнинг Қорасув туманида фермерлар учун ахборот маркази очилди.
Бу ерда фермерлар ҳудудий муассасалар мутахассислари, «Айил-Банк» ҳамда «Элдик Банк»нинг вакилларидан маслаҳат олишлари мумкин. Мутахассислар аҳолини якка тартибда қабул қилиб, муаммоларини ҳал этишга кўмаклашади.
«Марказдан фермерлар уруғлик ва кўчатларни қандай танлаш, нима етиштириш, тайёр озиқ-овқат маҳсулотларини қаерда сотиш, давлат томонидан қандай кўмак кўрсатилаётгани ҳақида маълумот олиши мумкин», — дейилади муассасада.
Бунгача Қишлоқ хўжалиги вазири Бақит Тўрабаев мазкур объектлар давлат хизматлари марказларидек ишлашини айтди. Лойиҳа энди Иссиқкўл, Жалолобод ва Ўш вилоятларида амалга оширилади.
