30 октябрь куни парламент йиғилишида депутат Нурбек Сидигалиев милиция ходимларини суратга ёки видеога олиш учун жарима ва жазоларни жорий этишни таклиф қилган қонун лойиҳасини кун тартибидан чиқаришни таклиф қилди.
«Кўплаб депутатлар буни қўллаб-қувватламаяпти. Агар сиз қарши бўлмасангиз, [қонун лойиҳасини] кун тартибидан чиқарсак-чи? Кейинроқ уни [қайта ишлаб чиқилгандан кейин] яна кўриб чиқамиз», — деб таклиф қилди депутат.
Депутатлар қонун лойиҳасини қайта кўриб чиқиш учун бир овоздан овоз берди.
Депутат Сеид Атамбаев фуқаролар, фаоллар ва журналистлар ҳуқуқбузарликларни қайд этишлари сабабли, ҳуқуқни муҳофаза қилиш органлари фаолияти шаффофлашганини таъкидлади. «Фуқаролар ўз хавфсизлигига тегишли бўлган ҳар қандай маълумотни қайд этмоқда, бу эса милиция ходимларини обрўсизлантириш учун эмас», — деди у.
«Тақиқ Қонун ва халқаро ҳужжатлар билан мустаҳкамланган фикр билдириш эркинлиги ҳуқуқини бузиши мумкин. “Ходимларнинг ишини обрўсизлантириш” деган тушунча жуда кенг ва ноаниқ. Фуқаролар ходимларга нисбатан танқид билдирса, бу “обрўсизлантириш” деб квалификация қилиниши мумкин», — дея изоҳлади Атамбаев.
Ишлаб чиқувчиларнинг фикрича, фуқаролар милиция иштирокидаги фото ва видеоматериалларни ижтимоий тармоқларда тарқатиб, уни обрўсизлантириш мақсадида фойдаланмоқда.
Шундай қилиб, ижтимоий тармоқларда тарқатиш учун фото ва видеоматериаллар ёзганлик учун фуқароларга 5 минг сом жарима ёки 5-7 суткагача қамоқ жазоси белгиланади.
Шунингдек, депутатлар Жиноят кодексининг «Безорилик» моддасини тўлдирмоқчи. Унда жамоат тартибини сақлаш мажбуриятини бажараётган ёки хизмат вазифасини адо этаётган шахсга нисбатан каршилик кўрсатиш билан боғлиқ безорилик учун жазо таклиф этилмоқда. Бу турдаги безорилик учун 50 мингдан 200 минг сомгача жарима ёки 5-7 йилга озодликдан маҳрум қилиш жазоси тайинланиши таклиф қилинмоқда.
