Москвада квартираларнинг бирига кириб, 78 ёшдаги эгасини ўлгунча калтаклаганликдаг гумонланган қирғизистонлик қўлга олинди. Бу ҳақда Тергов қўмитасининг Москва шаҳар бошқармаси билдирди.
Тергов маълумотларига кўра, воқеа 19 октябрда “Открытое шоссе”да жойлашган уйда содир бўлган.
«Гумонланувчи ноқонуний равишда квартирага кириб, аёлга ҳужум қилган ва унинг баданига кўплаб зарбалар йўллаган. Кўп ўтмай жабрланувчи олган жароҳатлари оқибатида шаҳар касалхоналаридан бирида вафот этган», — дейилади Тергов қўмитаси хабарида.
39 ёшли Қирғизистон фуқароси милиция томонидан қўлга олинди. Яқин кунларда тергов унга расман айб қўйиш ва уни ҳибсга олишни сўрашини таъкидлади.
ТАСС нашрининг хабар беришича, ҳалок бўлган аёл санъатшунос ва ёзувчи Раиса Кирсанова бўлган. Ҳуқуқ-тартибот идоралари журналистларга ўша куни уй аҳолиси «шубҳали эркак уларнинг эшикларини тақиллатгани» ҳақида шикоят қилганини маълум қилди.
«Регнум» нашри ўз манбасига таяниб ёзишича, гумонланувчи эркак ўша куни дўсти билан «ишга ўрнашиш юзасидан» гаплашиш учун “Открытое шоссе”га борган. Аммо манбанинг айтишича, у ишга ўрнаша олмай қолгандан кейин «спиртли ичимлик сотиб олиб», яқиндаги уйларнинг «ҳовлисига киради».
«Айни ўша вақтда 78 ёшдаги Раиса Кирсанованинг эшиги қулфланмаган бўлган ва у квартирага кириб борган», — деб билдирди манба.
У гумонланувчи ёзувчининг квартирасида ухлаб қолганини ҳам қўшимча қилди.
