Журналист Айке Бейшекеева Free Press Unlimited халқаро ташкилотининг Free Press Awards 2024 мукофоти билан тақдирланди. Бу ҳақда ташкилотнинг сайтида эълон қилинди.
Мазкур ташкилот ҳар йили икки журналистга Newcomer of the Year ва Most Resilient Journalist мукофотини топширади. Бу сафар мукофотга қирғизистонлик Айке Бейшекеева билан фаластинлик фотожурналист Мохаммеду Заануну лойиқ топилди.
Бейшекеева аввалроқ инсон ҳақларини ва эркинликни ҳимоя қилишда кўрсатган жасорати учун Прагада халқаро Cena Gratias Tibi мукофотига эга бўлган.
23 ёшдаги Айке Бейшекеева Temirov Live'нинг журналисти. У бошқа ҳамкасблари билан «тартибсизликларга чақириш»да айбланиб қўлга олинган. 10 октябрда уни ва Ақтилек Капаровни суд уч йиллик пробация билан озод қилган. Лойиҳа етакчиси Махабарат Тажибек қизи олти, оқин Азамат Ишенбеков эса беш йилга ҳукм қилинган. Бейшекеева суд ҳукмини адолатсиз деб ҳисоблайди.
