Қирғизистон Миллий хавфсизлик давлат қўмитаси (МХДҚ) раҳбари Камчибек Ташиев махсус хизмат ходимларининг рафиқаларига мурожаат қилиб, уларни «иложи борича кўпроқ фарзанд кўришга» чақирди. У бу ҳақда Ош шаҳрида чегарачилар ва МХДҚ ходимларининг фарзандлари учун очилган «Ақилман» болалар боғчаси очилиш маросимида билдирди.
Ташиевнинг фикрига кўра, Қирғизистоннинг ривожланиши учун ҳар бир оилада камида беш-олти нафар фарзанд бўлиши керак. «Шунчаки мамлакат ривожланиб кетмайди», — деб қўшимча қилди у.
«Сизлар турмуш қургансизлар ёки уйлангансизлар, агар соғлигингиз бунга имкон берса, фарзанд кўринглар. Иложи борича кўпроқ туғинглар […] Бизда ҳалигача бўйдок, турмуш қурмаган ходимлар бор, яқинда уларнинг катта фоизи аниқланди. Мен уларга оила қуришни маслаҳат бердим […] Бу сизларнинг вазифангиз, ҳурматли аёллар. Агар мен буни қўпол айтган бўлсам, узр сўрайман», — деди Давлат қўмитаси раҳбари.
Ташиевнинг таъкидлашича, махсус хизмат ходимларининг рафиқалари молиявий жиҳатдан хавотирга тушмасликлари керак. Унинг сўзларига кўра, Давлат қўмитаси ходимлари пул ва турар-жой билан таъминланади.
МХДҚ раҳбари Қирғизистон аҳолиси 7 миллиондан ошганини қайд этди. Энди қисқа вақт ичида 10 миллион, балки 15-20 миллион аҳолига етишиш зарурлигини, бошқа давлатлардан сони ва кучи бўйича орқада қолмаслик учун шу мақсадга эришиш муҳимлигини таъкидлади.
