Қирғизистонда 1 октябрдан бошлаб пенсиялар оширилади, аммо пенсионерларга электр энергияси учун берилган компенсациялар бекор қилинади. Бу ҳақда 20 сентябрь куни «Биринчи радио» эфирида Соцфонднинг жамоатчилик билан алоқалар бўйича бошқарма бошлиғи Женишбек Мукамбетов маълум қилди.
Унинг айтишича, бу қарор президентнинг пенсияларни индексация қилиш тўғрисидаги фармонига мувофиқ қабул қилинган.
Электр энергияси учун компенсациялар 2008 йилдан буён пенсия миқдорига қараб тўланган. Бу компенсацияларни дастлаб пенсияси 1500-2000 сомдан ошмаганлар олган, 2009 йилдан бошлаб эса пенсияси 4000 сомдан кам бўлганлар ҳақдор эди.
«1 октябрдан бошлаб бу компенсациялар тўлиқ бекор қилинади, шунинг учун пенсияларни қайта ҳисоблаганда бу компенсацияларни олиб ташлаймиз. Уларнинг миқдори пенсия миқдорига қараб 200 дан 312 сомгача», — деди Мукамбетов.
Соцфонд маълумотларига кўра, Қирғизистонда 785 минг пенсионер бор. Мукамбетовнинг сўзларига кўра, янги тўловлар тайинланиши сабабли пенсионерлар сони ҳар ой ўзгариб туради.
Сентябр ойи бошида ҳукумат раҳбари Ақилбек Жапаров 2024 йил 1 октябрдан бошлаб пенсияларни ошириш тўғрисида қарорга имзо чеккан эди. Ҳужжатга мувофиқ, Соцфонд октябргача базавий пенсия қисмини барча қўшимчалар билан 6900 сомгача ошириши керак. Ҳозирда базавий қисм ушбу суммадан паст. Шунингдек, пенсиянинг суғурта қисмини ҳам 18% га ошириш, аммо камида 1000 сомгача бўлиш вазифаси берилган.
