2015 йилдан бери «талончилик»да гумонланиб қидирувда бўлган Қирғизистон фуқароси Полшада қўлга олинди. Бу ҳақда «Клооп»га 16 февралда Ички ишлар вазирлигидан хабар беришди.
![](https://uz.kloop.asia/wp-content/uploads/sites/9/2024/02/4ec74c8d-81b7-4d3b-ba2a-b685215b93a3.jpg)
Маълумотларга кўра, 2015 йилда Қизилқия шаҳрининг Қоравон қишлоғида автомат билан қуролланган тўрт нафар номаълум шахс Honda CRV русумли автомашинани тўхтатган. Улар машина ҳайдовчисини «ўлдириш» билан қўрқитиб, ундан 1 миллион 30 минг доллар олиб кетишган.
Кейинроқ уч нафар гумонланувчи қўлга олинган, тўртинчиси эса номаълум томонга қочиб кетган.
Қочган гумондор 9 февраль куни Полша-Украина «Любачув» назорат-ўтказиш пунктида қўлга олинган.
«Ҳозирда уни экстрадиция қилиш ва жиноий жавобгарликка тортиш масаласи кўриб чиқилмоқда», — дейилади милиция хабарида.
Аввалроқ Ўш шаҳрининг Тилеке-Баатир кўчасида жойлашган савдо марказларидан бирини талон-тарож қилиб, 5 миллион 350 минг сом пулни ўғирлаган хориж фуқароси қўлга олинган эди.
Мазкур ҳолат юзасидан «Ўғирлик» моддаси билан жиноят иши қўзғатилиб, тергов ҳаракатлари олиб борилмоқда.